धनकुटा, जेठ २० । धनकुटाको पाख्रिबासमा बृहत निःशुल्क स्वास्थ्य शिविर सम्पन्न भएको छ ।
क्लबले पाख्रिबासमा बृहत निःशुल्क स्वास्थ्य शिविर आयोजना गरी औषधि वितरण गरेको हो । रोटरी क्लब अफ इटहरी र रोट्र्याक्ट क्लब अफ इटहरीले करीब ८ लाख रुपैयाँ बराबरको औषधि निःशुल्क वितरण गरेको थियो । शिविरमा उपचारका लागि आएका सर्वसाधारणलाई पाँचलाख र स्थानीय स्वास्थ्य चौकीलाई तीन लाख रुपैयाँ बराबरको औषधि वितरण गरिएको हो ।
शिविरमा एक हजार २७० बिरामीले स्वास्थ्य सेवा लिएको कार्यक्रम संयोजक कृष्णराज श्रेष्ठले जानकारी दिए ।
स्वास्थ्य शिविरमा सबैभन्दा बढी आँखा, हाडजोर्नी, मुटु तथा गाइनोका बिरामी आएका थिए । दुई दिनसम्म चलेको सो शिविरमा नोबेल मेडिकल कलेज, धनकुटा उद्योग बाणिज्य संघ, तथा पाख्रिवास नगरपालिकाले सहयोग गरेको थियो ।
