विराटनगर, १८ भदाै । विराटनगर महानगरका मेयर भीम पराजुलीले रथयात्रा अगावै सडक क्लियर बनाइने र रथयात्रालाई व्यवस्थित बनाइने बताएका छन् । सोमवार विहानै बाटो अनुगमनका क्रममा मेयर पराजुलीले रथयात्रा अगावै बाटोमा रहेका सवै अवरोधहरु हटाउने र रथयात्रा ब्यवस्थित बनाउन अधितम प्रयास गरिने बताए । मेनरोडमा कुनैे समस्या नभए पनि हाइ वे का केही स्थानमा समस्या रहेको भन्दै त्यसको समाधानका लागि पहल भइरहेको बताए । 
राधाकृष्ण धर्मशाला तथा राधाकृष्ण रथयात्रा आयोजक समितिका अध्यक्ष बाबुराजा ओझाले रथयात्रा सहजरुपमा सम्पन्न गरिने बताए । सडकका अधिकांस समस्या समाधान भइसकेको साथै रथयात्राका लागि आबश्यक सवै प्रक्रिया पुरा भएको जानकारी दिए । केहिदिन अघिदेखी राधाकृष्ण रथयात्राकै लागि रुट क्लियर गर्ने, खाल्डा खुल्डि पुर्ने र पिच गर्ने कार्य भइरहेको छ । यस्तै व्यापारिक विस्तार आयोजना(सिक्सलेन) का प्रमुख विनोद कुमार मौवारले रथयात्राका लागि सिक्सलेन परियोजनाले भरपुर सहयोग गरिरहेको बताए ।
