विराटनगर, २ मंसिर ।
विराटनगरको कन्चनवारी एयरपोर्टमोड देखि विमानस्थलको मुख्य गेटसम्मको सडक निर्माणका काम तिब्र पारिएको छ । विराटनगर महानगरपालिकाको विमानस्थल मार्ग स्तरोन्नती परियोजना अन्तरगत दोहोरो नाली निर्माण, टाली बिछ्याउने र पिच निर्माणको कामले तिब्रता पाएको हो । आज भन्दा करिब एक बर्ष अगाडी नै निर्माण शुरु गरिएको नाली र टाली बिछ्याउने काम सकिएको लामो समय पछि पिच निर्माणको कामले तिब्रता पाएको हो । 
विराटनगर महानगरपालिकाको ३ करोड २९लाख ८० हजार ४ सय ४१ रुपैयाँ लागत रकम छुट्याईएकोमा २ करोड ५९ लाख ७१ हजार १ सय ३५ रुपैयाँको लागतमा काम सक्ने सम्झौता भएको हो । २०७३ चैत ३ गते भएको ठेक्का सम्झौता अनुसार २०७५ जेठ मसान्तसम्ममा सकिसक्नु पर्नेमा बल्ल पिच निर्माणको काम अघि बढेको हो । 
विराटनगर १३को गिताञ्जली/जोशीला जे.भी.ले ठेक्कामा लिएको लामो समय पछि निर्माणको काम अन्तिम चरणमा पुर्याएको हो । एक बर्षसम्म आलटालमा नै विताएको निर्माण कम्पनीले अबको एक महिना भित्रैमा निर्माण पुरा गरी निर्माणको जिम्मा विराटनगर महानगरपालिकालाई बुझाउने तयारी गरेको छ ।
