काठमाडौं, १३ पुस। फिल्म ‘जानी नजानी’को ‘एउटीलाई मुटुमा घर अर्कीलाई कलेजीमा’ बोलको गीत सार्वजनिक गरिएको छ । गीतमा फिल्मका मनीष श्रेष्ठ र सुमी मोक्तान फिचर्ड छन् । गीतले सहरी युवकयुवतीको प्रेमलाई उठाएको छ ।
गीतमा संगीतकार अर्जुन पोखरेल र गायिका दुर्गा खरेलले आवाज दिएका छन् । संगीत पनि पोखरेलकै रहेको छ । रोमान्टिक भर्जनको गीत तयार पार्ने पोखरेलले यस फिल्मका लागि अलग स्वादको संगीत पस्केको बताए । ‘मैले गरिरहेको गीतभन्दा यो फरक छ’, उनले भने । फिल्मलाई वसन्त अधिकारीले निर्देशन गरेका छन् । उनको यो डेब्यु फिल्म हो । १८ वर्षको अनुभवलाई फिल्ममार्फत दर्शाएको उनले बताए ।
फिल्मको कथा, पटकथा र संवाद सामीप्यराज तिमल्सिनाले लेखेका हुन् । फिल्म आधुनिक प्रेमकथामा आधारित भएको बताउँदै उनले भने, ‘प्रेमकथाहरू खासै फरक त हुन्नन् तर त्यसमा नयाँ स्वाद पस्कने कोसिसचाहिँ गरेको छु ।’ फिल्म नेपाली परिवेशमा आधारित हुनुका साथै यसले सन्देश पनि दिन खोजेको उनको भनाइ थियो ।फिल्ममा मनिष श्रेष्ठ, निरिशा बस्नेत, सन्नी सिंह र नम्रता श्रेष्ठको मुख्य भूमिका छ । अन्य कलाकारमा प्रकाश अधिकारी, कृष्णभक्त महर्जन, रोशनी केसीको अभिनय छ ।
रोशनी इन्टरटेनमेन्टको ब्यानरमा निर्मित फिल्मकी प्रस्तुतकर्ता रोशनी केसी हुन् । फिल्ममा मोदनाथ खनाल र सागरकाजी मालीको निर्माण छ । फिल्म ‘जानी नजानी’ चैत १ गते प्रदर्शनमा आउँदै छ ।
