धरान, १४ माघ । बीपी कोइराला स्वास्थ्य विज्ञान प्रतिष्ठानमा आकस्मिक कक्षको विस्तार पुनः सुचारु भएको छ । प्रतिष्ठानको भ्रष्टाचार विरुद्ध उजुरी परेपछि छानबिनको कारण देखाउँदै स्वास्थ्यमन्त्री उपेन्द्र यादवले ६ महिनाअघि थप निर्माण रोकेका थिए । आकस्मिक कक्ष विस्तारको कार्यक्रम तथा बजेट प्रतिष्ठानको कार्यकारिणी समिति र सिनेट बैठकले पारित गरिसकेको छ ।
मन्त्री यादवकै निर्देशनमा पुनः विस्तारको काम सुचारु भएको हो । हाल ठेकेदार कम्पनीले निर्माण अघि बढाएको आकस्मिक विभागका प्रमुख डा. ज्ञानेन्द्र मल्लले बताए । प्रतिष्ठानको आकस्मिक कक्षमा बिरामीको बढ्दो चापले उपचार सेवा नै प्रभावित हुने गरेको छ । ‘अहिले आकस्मिक कक्षको क्षमता बढीमा ६५ जना बिरामीको मात्र हो,’ उनले भने, ‘तर यहाँ दैनिक १ सय २० को हाराहारीमा बिरामी आउँछन् ।’
आकस्मिक कक्षमा बिरामी बढ्दै गएकाले भुइँमा राखेर समेत उपचार गराउनुपर्ने अवस्था छ । ‘एचआईभी संक्रमित, क्षयरोग लागेका बिरामीलाई अलग्गै कोठा आवश्यक हुन्छ,’ मल्लले भने, ‘तर पूर्वाधार अभावले सेवा दिन समस्या भइरहेको छ ।’ उनका अनुसार आकस्मिक कक्ष ४० शैøया क्षमतामा विस्तार गर्न लागिएको हो ।
