विप्लव भट्टराई
इलाम — मेची राजमार्गभन्दा आधा कम दूरीमा झापाको बिर्तामोड पुग्न सकिने छोटो दूरीको मार्ग अस्थायी रूपमा सञ्चालनमा आएको छ । तराई झर्न फास्ट ट्रयाकका रूपमा लिइएको यो सडक इलाम नगरपालिकाको भञ्ज्याङबाट सोयाकसम्मको सडक खुलेसँगै झापासम्म सवारीका साधन आउजाउ गर्न थालेका छन् ।
भञ्ज्याँदेखि सोयाकसम्मको १० किलोमिटर सडक खुलेपछि तराई तथा जिल्लाका दक्षिणी र पश्चिमी गाउँसम्मको यात्रा पनि छोटिएको छ । मेची राजमार्ग भएर बिर्तामोड पुग्न ८३ किलोमिटर पार गर्नुपर्छ । नयाँ सडक खुलेपछि ४७ किलोमिटरमै पुग्न सकिने भएको छ । नयाँ खुलेको १० किलोमिटर कच्ची छ । बाँकी सोयकदेखि झापाको खुदुनावारीसम्म ग्राभेल सडक छ । उन्नती समावेशी बृद्धि कार्यक्रमअन्तर्गत पश्चिमी गाउँ जोड्ने सडक भर्खरै ग्राभेल भएको हो । बेलासेबाट सोयाक, सिद्धिथुम्का, जितपुर हुँदै गाग्रेभञ्ज्याङसम्मको २८ किलोमिटर सडक स्तरोन्नतिपछि त्यस क्षेत्रबाट साना तथा ठूला सवारी साधन तराई झर्ने गरेका छन् ।
