धरान, १६ माघ । धरान–८ स्थित भोटेपुलमा थ्रीस्टार लेभलको होटल सञ्चालनमा आउने भएको छ । धरानका युवा व्यवसायी गोपाल आचार्यले यही माघ २५ गतेदेखि होटल गजुर प्यालेस सञ्चालनमा ल्याउन लागेका हुन् । उनले करीब ८ करोड ४५ लाखको लगानीमा होटल सञ्चालनमा ल्याउन लागेको बताए ।
धरानमा सुविधा सम्पन्न होटल खुल्ने क्रम बढ्दै गएको छ । धरान आउने पर्यटकहरूका लागि सुविधा सम्पन्न होटलहरू नहुँदा पर्यटक धरान आसपासका शहरहरूमा बस्न थालेपछि धरानका व्यवसायीले सुविधा सम्पन्न होटल सञ्चालनमा ल्याउन थालेका हुन् ।
व्यवस्थित अन्डरग्राउन्ड पार्किङसहित सञ्चालनमा आउन लागेको होटलमा किङस्वीट रूम, स्वीट रूम, प्रिमियम डिलक्स रूम, एक्सक्ल्युसिव डिलक्स रूम, सुपेरियर डिलक्स रूम र टुइन डिलक्स रूम रहेका छन् । कोठाको स्तरअनुसार न्यूनतम ४ हजार ९ सयदेखि अधिकतम १९ हजार ९ सयसम्म मूल्य तोकिएको छ ।
होटल गजुर प्यालेसमा सेमिनारका लागि २ सय जनासम्म अट्ने हल, ४ सय जनासम्म अट्ने पार्टी प्यालेस, भीआईपीका लागि आकर्षक लन्चबारसमेत रहेको छ ।
