विराटनगर, १ वैशाख । विराटनगर महानगरपालिका १२ निवासी गुरु बराललाई राष्ट्रपति विद्यादेवी भण्डारीद्वारा सुप्रवल जनसेवा श्री विभुषण प्रदान गरिएकाे छ ।
नेपाल राष्ट्रको गौरव एवं नेपाली जनताको हित अभिवृद्धिमा भएको उल्लेखनीय योगदानका गर्ने ब्यक्तिलाई गरिने सम्मान अनुसार बराललाई सुप्रवल जनसेवा श्री विभुषण प्रदान गरिएकाे हाे ।
२०७५ को संविधान दिवसका अवसरमा घोषणा भए बमोजिम विराटनगरका बराल सहित अन्य ब्यक्तिहरुलाई पनि बिभन्न विभुषण प्रदान गरिएकाे छ । बराल मदन भण्डारी स्मृति प्रतिष्ठान नेपालका अध्यक्ष समेत हुनु हुन्। सामाजिक क्षेत्रमा अग्रसर गुरु बराल राजनीतिमा समेत अब्बल मानिन्छन् । उनी सहित विभिन्न क्षेत्रका १६२ लाई प्रबल जनसेवाश्री प्रदान गरिएकाे छ ।
यी ब्यक्त्तिले पनि पाए तक्मा
सरकारले नेपाल कम्युनिष्ट पार्टीका संस्थापक महासचिव पुष्पलाल श्रेष्ठ (मरणोपरान्त) लाई ‘नेपालरत्न’ द्वारा विभूषित गरेको छ । राष्ट्रपति विद्यादेवी भण्डारीले आइतबार राष्ट्रपति भवनमा आयोजित विशेष समारोहमा पुष्पलाल श्रेष्ठ (मरणोपरान्त) लाई ‘नेपालरत्न’ द्वारा सुशोभित गरेकी हुन् ।
उक्त विभूषण पुष्पलालका छोरा उमेशलाल श्रेष्ठले ग्रहण गरे । त्यस्तै राष्ट्रपतिले सङ्गीतज्ञ अम्बर गुरुङ (मरणोपरान्त) र वाङ्मय शताब्दी पुरुष सत्यमोहन जोशीलाई महाउज्ज्वल राष्ट्रदीप (प्रथम श्रेणी) मानपदवीद्वारा विभूषित गरिन् ।
कार्यक्रममा पूर्वप्रधानन्यायाधीश ओमप्रकाश मिश्रलाई सुप्रसिद्ध प्रबल जनसेवाश्री (प्रथम श्रेणी) एवं साहित्यकार दिनेशहरि अधिकारी, गायक तथा अभिनेता हरिप्रसाद रिमाल (मरणोपरान्त) र इतिहासकार प्रा दिनेशराज पन्तलाई सुकीर्तिमय राष्ट्रदीप (तृतीय श्रेणी) पदकद्वारा विभूषित गरिएको छ ।
विभिन्न क्षेत्रका ९६ जनालाई सुप्रबल जनसेवाश्री (तृतीय श्रेणी), साहित्यकार झमककुमारी घिमिरेलाई कीर्तिमय राष्ट्रदीप (चतुर्थ श्रेणी), विभिन्न क्षेत्रका १६२ लाई प्रबल जनसेवाश्री (चतुर्थ श्रेणी) र ७४ जनालाई जनसेवाश्री (पञ्चम श्रेणी) मानपदवीद्वारा विभूषित गरिएको छ ।
राष्ट्रिय जीवनका विभिन्न क्षेत्रमा रही उत्कृष्ट कार्य गरेबापत सरकारद्वारा गत वर्ष संविधान दिवसका दिन घोषणा गरिएका उनीहरुलाई राष्ट्रपतिले आइतबार सुशोभित गरेकी थिइन् । सो अवसरमा उपराष्ट्रपति, प्रधानमन्त्री, सभामुख, राष्ट्रियसभाका अध्यक्ष, उपप्रधानमन्त्री, मन्त्री, संवैधानिक निकायका प्रमुख, विशिष्ट श्रेणीका कर्मचारी, सुरक्षा निकायका प्रमुखलगायत उपस्थित थिए ।
