विराटनगरमा करेन्ट लागेर एकजनाको मृत्यु, सुरक्षित छैनन पोल सार्ने कर्मचारी

विराटनगर, ३ बैशाख ।
विराटनगरमा करेन्ट लागेर एकजनाको ज्यान गएको छ । बिराटनगरको जिल्ला सरकारी वकिल कार्यालय र जिल्ला अदालतको पुर्बमा रहेको निर्माणाधिन सडक नजिकैको पोलमा करेन्ट लागेर एकजनाको ज्यान गएको हो ।

यसरी ज्यान जानेमा पर्सांको सखुवापर्सेनी गाउँपालिका १ का भोजराज दुलाल रहेको जिल्ला प्रहरी कार्यालय मोरङका डिएसपी घनश्याम श्रेष्ठले जानकारी दिए । उनी आशिष कन्ष्ट्रक्सनको पेटी ठेकेदार कर्मचारी रहेको प्रहरीले जनाएको छ । करेन्ट लागेका दुलालको नजिकै रहेको गोल्डेन अस्पताल लैजाँदै गर्दा ज्यान गएको हो ।

विराटनगरमा विकासको काम सँगै बिजुलीको पोलहरु सार्ने काम भईरहेको छ । बिजुलीको पोल सार्ने ठेक्का लिएको आशिष निर्माण सेवाले लगाएको पेटी ठेकेदारले बिजुलीको पोल सार्दा उनको ज्यान गएको डिएसपी श्रेष्ठले बताए ।
बिजुलीको लाईन काटिएको भएपनि उनलाई नजिकै रहेको सरकारी वकिल कार्यालयको जेनेरेटरकाे करेन्ट ब्याक भएर त्यसको झड्काले ज्यान गएको ठेकेदार कम्पनीको भनाई छ ।

आशिष निर्माण सेवाका कर्मचारी नितेश हुमागाईँका अनुसार जेनेरेटरको करेन्ट ब्याक भई आएर दुलाललाई करेन्ट लागेको हो । दुलाल बिगत १ बर्ष देखि यसरी बिजुलीको पोल सार्ने र तार लगाउने कार्यमा आबद्ध रहँदै आएका थिए ।
यो सहित बिराटनगरमा पोल सार्ने क्रममा करेन्ट लागेर २ जनाको ज्यान गईसकेको छ । भने २ जनालाई करेन्ट लागिसकेको छ ।