विद्यार्थी सङ्ख्या कम भएका कारण इलामका चार दर्जन सामुदायिक विद्यालयको अस्तित्व सङ्कटमा परेको छ ।
विद्यार्थी कम भएका कारण ४८ वटा प्रावि बन्द हुने अवस्थामा पुगेका हुन् । ती विद्यालयमा न्यूनतम चारदेखि अधिकतम २० जना मात्र विद्यार्थी छन् । विद्यार्थी कम हुँदा शिक्षक विद्यार्थीको अनुपात नमिलेको जिल्ला शिक्षा कार्यालय इलामले जनाएको छ । सूर्याेदय नगरपालिकाको पञ्चकन्यास्थित भवानी प्रावि माघेमा पाँचजना विद्यार्थीका लागि तीनजना शिक्षक कार्यरत छन् ।
यस्तै त्यहि नगरपालिकाको फिक्कल आहाले स्थित कृष्ण प्राविमा सातजना विद्यार्थीका लागि चारजना शिक्षक कार्यरत छन् । जिल्ला शिक्षा अधिकारी टङ्कप्रसाद गौतमले शिक्षक विद्यार्थी अनुपात अत्यन्तै कम देखिएपछि दरबन्दी मिलान गर्न लागिएको बताउनु भएको छ ।
सिद्धार्थ प्रावि साँखेजुङ, पुवामाई प्रावि साँखेजुङ, शान्ति प्रावि समालबुङ, अरनिको प्रावि रक्से, लालीगुराँस प्रावि माईमझुवामा १० जनाभन्दा कम विद्यार्थी अध्ययनरत छन् ।
निम्नमाध्यमिक तह र माध्यमिक तहमा शिक्षक दरबन्दी नपुगेर निजी तथा अन्य स्रोतबाट शिक्षक राख्नुपर्ने अवस्था छ भने प्राथमिक तहमा शिक्षक विद्यार्थी बिना नै बसिरहेका छन् । प्रावि तहमा विद्यार्थी अनुपातमा शिक्षक राख्ने हो भने सबै विद्यालयमा शिक्षक अभाव नहुने जिल्ला शिक्षा अधिकारी गौतमको भनाई छ ।
सूर्याेदय प्रावि श्रीअन्तु, राष्ट्रिय प्रावि जौवारी जमुना, सूर्याेदय प्रावि मावुमा ११÷११, सिंहदेवी प्रावि जितपुर, अमरज्योति प्रावि जितपुर र महमाई प्रावि बरबोटेमा १२÷१२, भानुभक्त प्रावि समालबुङ, लालीगुराँस प्रावि जोगमाई र जनज्योति प्रावि फाकफोकमा १३÷१३ जना विद्यार्थी अध्ययनरत छन् ।
१४ जना विद्यार्थी भएका तीन, १५ जना विद्यार्थी भएका चार, १६ जना विद्यार्थी भएका तीन, १७ जना विद्यार्थी भएका चार, १८ जना विद्यार्थी भएका दुई, १९ जना विद्यार्थी भएका सात र २० जना विद्यार्थी भएका सातवटा प्रावि गरी ४८ वटा रहेका छन् ।
..........
