विराटनगर । चोरी घटनामा बृद्धि हुन थालेपछि त्यसलाई नियन्त्रण गर्न प्रहरीले प्रदेश १ को राजधानी विराटनगरमा ‘स्वीप अप्रेशन’ नाम दिएर अभियान सञ्चालन गरेको छ । साउन दोस्रो साता यता मात्रै विराटनगर महानगरपालिकाका भित्र साना तथा ठूला गरेर डेढ दर्जन चोरीका घटना भइसकेका छन् ।
रातको समयमा हुने चोरी नियन्त्रण गर्न प्रहरीलाई टाउको दुखाईको विषय बनेको थियो । चोरी नियन्त्रण गर्न विशेष अभियान चलाएपछि शंकास्पद चार सय ६२ जनामाथि ‘स्क्रिनिङ’ गरिएको मोरङ प्रहरी प्रमुख एसपी विश्व अधिकारीले बताए ।
आवश्यक सोधपुछ र अनुसन्धानका क्रममा चोरी गरेको पुष्टि भएपछि १० जनामाथि मुद्दा नै चलाइसकिएको र अन्य केही व्यक्तिलाई पक्राउ गर्ने योजना बनाइएको उनको भनाइ छ ।
।
‘चोरीका घटना हुन थालेपछि त्यसका विरुद्ध प्रहरी सक्रियता बढाएर ‘स्वीप अप्रेशन’ चलाइएको छ,’ अधिकारीले भने, ‘निगरानी बढाउँदै शंकास्पद व्यक्तिहरुलाई धमाधम नियन्त्रणमा लिएर सोधपुछ र अनुसन्धान गर्न थालिएको छ ।’
अप्रेशन अन्तर्गत प्रहरीले नियन्त्रणमा लिएर सोधपुछ र अनुसन्धान गर्ने तथा आवश्यक परे कानुनी कारबाही नै अघि बढाउने उनको भनाइ छ । धेरै व्यक्तिलाई नियन्त्रणमा लिएर ‘स्क्रिनिङ’ गर्दै केहीमाथि मुद्दा चलाएपछि चोरीका घटना हुन छाडेको अधिकारीले बताए । अभियान पछि विराटनगर भित्र एक साता यता चोरीका कुनै पनि घटना हुन नपाएको एसपी अधिकारीको दाबी छ । प्रविधिको सहयोग र मुभमेन्टका हिसावले २४ घण्टा नै प्रहरी परिचालन गरेर चोरी नियन्त्रणको प्रयास भइरहेको एसपी अधिकारीले बताए ।
