बाबुरामले चुनाव लड्दा लागेको ४० लाख तिर्न अझै बाँकी
एमाओवादी एक अर्ब ऋणमा,मासिक आम्दानी १० लाख मात्रै
युद्दकालदेखि नै ऋणमा रहेको एमाओवादीका कमिटिहरु दुईपटकका संविधानसभा निर्वाचनले चुर्लुम्म डुबेका छन् । शान्तिप्रक्रियामा र संविधानसभा चुनावसम्म गरी करिब एक अर्ब ऋणमा छ एमाओवादी ।
आजको नयाँ पत्रिका दैनिकका अनुसार दुईपटक भएको संविधानसभा चुनावका लागि र कतिपय ठाउँमा निजी प्रयोजनका लागि लिएको ऋण तिर्न नसक्दा धेरै नेता नतावमा छन् । कतिपय नेताले ऋण तिर्न नसकेर जिल्ला आउजाउ गर्नै घटाएका छन् । पाँचथरका पूर्व जिल्ला इन्चार्ज तथा सभासद् श्रीप्रसाद जबेगुले चुनाव प्रचारमा गाउँ जाँदा ‘ऋण कहिले तिर्ने’ भनेर साहुहरुले उल्टै हप्काएको र अदालत जाने चेतावनी सुनाएको बताए ।
पछिल्लो पटक संविधानसभा चुनावमा कार्यकर्तालाई खुवाएको खाना,माइक र मञ्च व्यवस्थापनसम्मको रकम एमाओवादीले अझै तिर्न सकेको छैन । केन्द्रले जिल्लामा लिइएको ऋण स्थानीयस्तरबाटै व्यवस्थापन गर्न निर्देशन दिएको छ । तर,जिल्लाले सकेको छैन । जिल्ला नेतृत्व चाँडोचाँडो फेरिने र पार्टी अन्तरसंघर्षको समस्याले ऋण व्यवस्थापन जटिल बनेको नेताहरु बताउँछन् । एमाओवादीको अहिले मासिक आम्दानी केबल १० लाख मात्रै छ । यो आम्दानी पनि सभासद्हरुबाट हुने गरेको हो ।
यसैबीच,दोस्रो संविधानसभा निर्वाचनमा रुपन्देही ४ मा भएको खर्चमध्ये झन्डै ४० लाख रुपैयाँ अझै तिर्न बाँकी छ । यो क्षेत्रबाट बरिष्ठ नेता तथा पूर्वप्रधानमन्त्री डा. बाबुराम भट्टराई चुनाव लडेका थिए ।
भट्टराईको क्षेत्रमा डिलाराम आचार्य,रामप्रसाद बन्जाडे,यज्ञ आचार्य,भक्ति पाण्डेलगायतका नेता व्यवस्थापनमा खटिएका थिए,आजको नयाँ पत्रिका दैनिकमा खबर छ ।
