अमेरिका निर्यात हुन थालेपछि इलामका उत्तरी मावु, माईमझुवा, माईपोखरी, सुलुबुङ, जमुना, सुम्वेक, पुवामझुवा गाविसमा बाक्लै रूपमा डेरी उद्योग स्थापना भएका छन् । किसानले गाई पालेर दूध उत्पादन गरी छुर्पी बनाउँदै आएका छन् । किसानले प्रतिकिलो ३सय २० रुपैयाँमा छुर्पी बेच्न थालेको जमुनाका मनोज भट्टराईले बताउनु भयो । पूर्वका २०० भन्दा बढी डेरी उद्योग र लेकाली क्षेत्रका चौँरी गोठबाट कम्पनीले छुर्पी सङ्कलन गर्न थालेको छ । पशुसेवा कार्यालय इलामका अनुसार जिल्लामा हालसम्ममा ११२ वटा डेरी उद्योग स्थापना भएका छन् । उद्योगले दैनिक ५० देखि ५०० लिटरसम्म दूध प्रशोधन गर्ने गरेको पशु विकास अधिकृत ध्रुवकुमार यादव बताउनुहुन्छ ।
