ईलामको दक्षिणी महमाईको एक विद्यालय ११ वर्षदेखि सामुदायिक वनको भवनमा सञ्चालन भइरहेको छ ।
महमाई वडा नं ८ स्थित बालकल्याण प्राथमिक विद्यालय, भवन अभावमा स्थापनाकालदेखि नै रातेचुली सामुदायिक वनको भवनमा सञ्चालन भइरहेको हो ।
भवन मात्र भएकाले त्यहाँ अन्य भौतिक पूर्वाधार अभावमा विद्यार्थीको अतिरिक्त क्रियाकलापमा समस्या भएको विद्यालयले जनाएको छ ।
सामुदायिक वनको भवनमा विद्यार्थीलाई पिउने पानीको समेत प्रबन्ध छैन । शौचालय भए पनि पानी अभावमा प्रयोगविहीन अवस्थामा रहेको अभिभावकको भनाई छ ।
विद्यार्थी शौच गर्न अन्यत्रै जानुपर्ने बाध्यता रहेको बिद्यालयका प्रधानाध्यापक अनिन्द्रबहादुर कार्कीले जानकारी दिनुभयो ।
