चिसो अत्यधिक बढेपछि सिरहा जिल्लाका सामुदायिक विद्यालय तीन दिन बन्द गर्ने निर्णय भएको छ । आज ल्होछार पर्व भएकोले भोलिदेखि विद्यालय बन्द राख्ने निर्णय भएको हो ।
सिरहा सदरमुकाममा आज बसेको पेसागत शिक्षक सङ्घ सङ्गठनको बैठकले भोलिदेखि शुक्रबारसम्म तीन दिन विद्यालय बन्द गर्ने निर्णय भएको नेपाल शिक्षक सङ्घका जिल्ला अध्यक्ष मनोजकुमार यादवले जानकारी दिनुभयो ।
जिल्लामा ३०५ वटा प्राथमिक विद्यालय, ५३ वटा माध्यमिक विद्यालय र ७४ वटा उच्च मावि रहेको जिल्ला शिक्षा कार्यालय सिरहाले जनाएको छ ।
चिसोले हालसम्म चारजनाको ज्यान गइसकेको छ । ज्यान जानेहरुमा इटहर्वा–२ का ६० वर्षीय लखन पासवान, चन्द्रअयोध्यापुर–७ का लालदेव सदाको २० दिनकी छोरी अञ्जुकुमारी सदा, सुखीपुर–८ का ६० वर्षीय बौवा सदाय र विद्यानगर–२ का ५० वर्षीया आशादेवी मण्डल रहेको जिल्ला प्रहरी कार्यालय सिरहाले जनाएको छ ।
केही दिनदेखि चलेको शीतलहर र बाक्लो हुस्सुका कारण जाडो अत्यधिक बढेपछि सिरहासहित तराईको जनजीवन नराम्ररी प्रभावित बनेको छ । बजारमा चहलपहल घटेको छ । मानिस घरमै घुरा (आगो) बालेर तापिरहेका देखिन्छन् ।
