माघे संक्रान्तिको अवसरमा इलाममा माइबेनी मेला र झापामा माईधार मेला सुरू भएको छ । इलामको माई र जोगमाई खोलाको दोभानमा पर्ने माईबेनीमा आजदेखि मेला सुरू भएको छ । तीन दिनसम्म लाग्ने मेलामा मकर नुहाउने र मेला भर्न आउनेको घुइँचो लाग्न थालेको मेला आयोजक समितिले जनाएको छ । माईखोलामा स्नान गर्दा सबै पाप हरण हुने धार्मिक विश्वासका साथ सर्वसाधारण बेनी मेलामा मकर नुहाउनसमेत जाने गरेका छन् । यहाँ मकर स्नान गर्न छिमेकी जिल्ला पाँचथर, ताप्लेजुङ तथा सीमावर्ती भारतको दार्जिलिङ, सिक्किम, मिरिकबाट हजारौं सर्वसाधारण एक सातादेखिनै माईबेनी पुगेका छन । इलाम जिल्लाको नामसालिङ र गोदक गाविसअन्तर्गत माईबेनीमा यो मेला वर्षौअघिदेखि लाग्दै आएको छ । यसवर्ष पनि माघे सङ्क्रान्तिको अवसरमा झापाको कनकाई माईधारमा भव्य मेला लागेको छ । मेलामा रोटेपिङ, विज्ञानकला, राष्ट्रिय कलाकारहरूद्वारा सांस्कृतिक कार्यक्रम हुने जनाइएको छ । माईधारमा मकर स्नानका लागि हजारौं नागरिक मेलामा जाने गरेका छन ।
............................
