लामो समयदेखि विभिन्न व्यक्तिहरूलाई अपहरणको धम्की दिँदै फिरौती रकम माग गर्ने एक भारतीय नागरिकलाई प्रहरीले झापाको विर्तामोडबाट पक्राउ गरेको छ।
बिगत ५/६ महिना अगाडिदेखि नेपाल टेलिकम, एनसेल र भारतीय कम्पनीका समेत गरी विभिन्न मोबाइल नम्बरबाट फोन गरी धाक धम्की दिई फिरौती रकम माग गर्ने भारतीय नागरिक उदाङ भन्ने भाबि सिंह राजबंशीलाई विर्तामोड प्रहरीले आज पक्राउ गरेको हो । पक्राउ परेका राजवंशीको साथबाट प्रहरीले ४ थान नेपाली सिम र एक थान भारतीय सिमसहित तीन थान मोबायल सेट बरामद गरेको छ।
राजबंशी बिगतमा लागु औषध मुद्दामा २ बर्ष कैद समेत भुक्तान गरी ५ महिना अगाडि थुनामुक्त भएका थिए । थुनामुक्त भएलगत्तै आर्थिक लाभ गर्ने उद्देश्यले उनले बिभिन्न व्यक्तिहरूलाई धाक धम्की दिँदै रकम माग्ने गरेको खुल्न आएकोले थप अनुसन्धान भइरहेको इलाका प्रहरी कार्यालय विर्तामोडले जनाएको छ ।
