इटहरी, २१ जेठ : पछिल्लो समय इटहरी र आसपासको क्षेत्रमा मोटरसाइकल चोरीमा संगठित गिरोह सक्रिय रहेको पाइएको छ । दर्जनौं मोटरसाइकल चोरी भइसक्दा पनि प्रहरीले चोरलाई समाप्त सकेको छैन । केही दिनअघि मात्रै इटहरीस्थित प्लस कम्युनिकेशनका विनोद चौधरीको मोटरसाइकल चोरी भएको छ । कार्यालयको ताला फोरेर मोटरसाइकल चोरी गरेको पाइएको छ । मोटरसाइकल चोरीका सबै दृश्य सिसी क्यामेराले कैद गरेको छ । उक्त दृश्यसहित उजुरी दिंदा पनि प्रहरीले चोरको पहिचान गर्न नसकेको कम्युनिकेशनका दीपल काफ्लेले गुनासो गर्नुभयो । सिसी क्यामेराको दृश्यलाई गम्भीर भएर अनुसन्धान गर्ने हो भने तत्कालै चोरहरु पक्राउ पर्ने उहाँको भनाइ छ । “अहिलेसम्म प्रहरीले चोरको पहिचानसमेत गर्न सकेको छैन,” उहाँले भन्नुभयो, “प्रहरीलाई भेट्न जाँदा अनुसन्धान भइरहेको छ मात्रै भन्छ ।”
