पाँचथर भदौ ८ , सरकारले सडक बनाउन वास्ता नगरेपछि इलाम र पाँचथर सीमा विकट गाउँ रानीटार ९ का बासिन्दाले ३० लाख रुपैया संकलन गरी सडक निर्माण गरेका छन् । सरकारी निकायलाई पटकपटक गुहार गर्दा समेत सडक बनाउन कुनै चासो नदेखिएकाले स्थानीयले आफ्नो गाउँको सडक आफ्नै लगानीमा बनाएका हुन । प्रतिघर दुई लाख रुपैयाका दरले १५ परिवारबाट रकम जुटाई गाउँमा आधारभूत सेवा व्यवस्था गरेको स्थानीयको भनाइ छ । वर्षौंदेखि सेवा सुविधाबाट बञ्चित भएका जनता सरकारको मुख ताक्नुभन्दा आफै गर्नु उचित लागेर गरेको स्थानीय मदन राईले बताए । उनिहरुले ५ किमि सडक , घरघरमा पानीको धारा , विद्युत पोलको व्यवस्था गरी घरमा र सडकमा बत्ती बालेका छन् ।
