अखिल नेपाल फुटबल संघ एन्फाको बुधबार बसेको कार्यसमिति बैठकले लामो समयदेखि आयोजना नभएको ‘ए’ डिभिजन लिग मंसिर १४ गतेबाट गर्ने निर्णय गरेको हो ।
पछिल्लोपटक २०७० सालमा मनाङ मस्र्याग्दी क्लबले जितेयता ‘ए’ डिभिजन लिग आयोजना हुन सकेको छैन । त्यसको २ वर्षपछि नयाँ संरचनाको राष्ट्रिय लिग फुटबल भने आयोजना गरिएको थियो ।
एन्फा बैठकले ललितपूरको थ्री स्टार फुटबल क्लबलाई क्षतिपूर्ति दिने विषयमा सैद्धान्तिक सहमति गरे पनि विस्तृत अध्ययन गर्न एन्फाका वरिष्ठ उपाध्यक्ष मणि कुँवरको संयोजकत्वमा ३ सदस्यीय कमिटी गठन गरेको छ ।
कार्यसमितिका सदस्यद्वय गणेश बहादुर चन्द र दिनेश ब्यन्जन्कार सम्मिलित कमिटीले १० दिनमा अध्यक्षसमक्ष प्रतिवेदन प्रस्तुत गर्नेछ ।
उक्त प्रतिवेदन कार्यसमितिमा प्रस्तुत भएपछि विशेष साधारण सभामा निर्णयार्थ पेस गरिने बताइएको छ ।
एन्फाले विधान संसोधनका लागि आगामी असोज २३ गते विशेष साधारण सभा गर्ने भएको छ । एन्फा चुनाव भने संशोधित विधान अनुसार आगामी पुस २३ गते हुनेछ ।
