रसियन टेनिस सुन्दरी मारिया सारापोभा युएस ओपन टेनिसको तेस्रो चरणमा प्रवेश गरेकी छन् । निलम्बनबाट फुकुवा हुँदै टेनिस कोर्ट फर्किएकी सारापोभा बुधबार भएको दोस्रो चरणमा हंगेरीका टाइमिया बाबसलाई पराजित गर्दै तेस्रो चरणमा पुगेकी हुन् ।
करिब १५ महिनापछि पहिलो ग्राण्डस्लामको रूपमा युएस ओपन खेलेकी सारापोभाले बाबसलाई ६–७ (४ – ७ ), ६–४ र ६–१ को सेटमा हराएकी हुन् । सारापोभाले पहिलो चरणमा दोस्रो बरियताकी रोमानियाकी सिमोना हालेपलाई पराजित गरेकी थिइन् ।
जितपछि सारापोभाले आफूलाई आफ्नो क्षमतामा विश्वास रहेको र समर्थकहरूको मायाले सम्भब भएको बताईन् । सारापोभाले भनिन् , “मलाई थाहा छ मैले गर्न सक्छु र मैले पुरा गरे । म टेनिसमा फर्कदा समर्थकहरुको माया अद्भुत रह्यो, यो मेरो लागि सबैभन्दा ठुलो कुरा हो ।“ अब चौथो चरणमा प्रवेशको लागि सारापोभाले अमेरिकन सोफिया किनको सामना गर्ने छिन् ।
शत्तिवद्र्धक औषधि प्रयोग (डोपिङ) मा असफल भएपछि ५ पटकको ग्राण्डस्लाम विजेता सारापोभालाई टेनिस फेडेरेसनले निलम्बन गरेको थियो । हाल १४६ औं वरियताकी सारापोभाले सन् २००६ मा युएस ओपनको उपाधि जितेकी थिइन् । सारापोभाले सन् २०१६ मा अष्ट्रेलियन ओपन खेलेकी थिइन् ।
युएस ओपन अन्तर्गत नै अमेरिकन भेनस विलियम्स पनि तेस्रो चरणमा प्रवेश गरेकी छिन् । नवौ बरियताकी भेनसले फ्रान्सकी ओसिना डोडीनलाई ७ – ५ र ६ – ४ ले पराजित गरिन । पुरुषतर्फ क्रोएसियाका मारिन किलीच, स्विस साम क्वारी र बेल्जियमका डेभिड गोफिनले पनि तेस्रो चरणमा स्थान बनाएका छन् ।
