एभरेष्ट प्रिमियर लिग (ईपीएल) क्रिकेट अन्तर्गत पहिलो क्वालिफायर्समा भैरहवा ग्लाडिएटर्सले विराटनगर वारिवर्सलाई जितका लागि १२८ रनको लक्ष्य दिएको छ । भैरहवाले दिएको १२८ रनको लक्ष्यसहित विराटनगरले केहि बेरमा जवाफी ब्याटिङ थाल्नेछ ।
कीर्तिपुरस्थित टियु क्रिकेट मैदानमा टस जितेर विराटनगरले फिल्डिङ रोजेपछि ब्याटिङ गरेको भैरहवाले २० ओभरमा ८ विकेट गुमाएर १२७ रन बनायो । खराब सुरुवात गरेको भैरहवाको सम्मानजनक स्कोरको लागि आरिफ शेख र पुनित मेहेराले सम्हालिएको प्रदर्शन गरेका थिए । मात्र १८ रन जोड्दा महत्वपूर्ण ३ विकेट गुमाएको भैरहवाका लागि शेख र मेहेराले पाँचौ विकेटको लागि ८२ रनको साझेदारी गरेका थिए । शेख ४६ रनमा क्याच आउट भए । उनले ३१ बलमा १ चौका र ३ छक्का प्रहार गरे । मेहेरा ४९ रनमा आउट भए ।
यस्तै भैरहवाका कप्तान शरद भेषवाकर ८ रनमा आउट हुँदा राहुल यादव ७, प्रथम सालुन्के ३ तथा भुपेन्द्र थापा २ रन बनाएर आउट भए । विराटनगरका करण केसी र सहान अदिशाले समान २ – २ विकेट लिए । त्यस्तै कप्तान पारस खड्का, बसन्त रेग्मी र अभिनास कर्णले समान १ – १ विकेट लिए ।
इपिएल क्रिकेटमा विराटनगर अपराजित रहदै शिर्ष स्थानमा रहदै क्वालिफायर्समा पुगेको हो । यस्तै लिग चरणको खेलमा विराटनगरसँग ६१ रनले पराजित भैरहवा दोस्रो स्थानमा रहदै क्वालिफायर्समा पुगेको हो । लिगमा विराटनगरले १० अंक जोड्दा भैरहवाले ८ अंक जोडेको थियो ।
पहिलो क्वालिफायर्समा विजेता हुने टोलीले फाइनलमा स्थान बनाउनेछ भने पराजित हुने टोलीले फाइनल प्रवेशका लागि तेस्रो र चौथो टिमबीचको विजेतासँग एलिमिनेटर खेल खेल्नेछ । पहिलो एलिमिनेटरमा ललितपुर ग्लाडीयटर्स र पोखरा राइनोजबीच खेल हुनेछ । इपिएलको विजेताले २१ लाख रुपैयाँ पुरस्कार प्राप्त गर्नेछन् ।
