एजेन्सी । घरेलु टोली दक्षिण अफ्रिकाले चौथो एकदिवसीय क्रिकेटमा भारतलाई पराजित गरेको छ । जोहनबर्गमा शनिबार राति भएको चौथो खेलमा दक्षिण अफ्रिकाले पाहुना टोली भारतलाई डकवर्थ लेविस (डिएल) पद्धतिको आधारमा ८ विकेटले पराजित गरेको हो ।
भारतले दिएको २९० रनको लक्ष्यसहित दक्षिण अफ्रिकाले जवाफी ब्याटिङ्ग गरिरहँदा बर्षाले खेल प्रभावित गरेको थियो । त्यसपछि २८ ओभरमा झारिएको खेलमा दक्षिण अफ्रीकाले २०२ रनको नयाँ लक्ष्य पाएको थियो । उक्त लक्ष्य दक्षिण अफ्रीकाले १५ बल बाँकी रहदै मात्र ५ विकेटको क्षतिमा पुरा गर्यो ।
दक्षिण अफ्रिकाको लागि हेन्रीच क्लासेनले अविजित ४३ तथा डेभिड मिल्लरले ३९ रनको योगदान दिए । त्यस्तै हासिम अमलाले ३३, एबी डीभिलियर्सले २६ तथा एडिन मार्क्रमले २२ रन जोडे । भारतका कुलदिप यादबले २ विकेट लिए ।
यसअघि टस जितेर पहिले ब्याटिङ गरेको भारतले पुरै ५० ओभरमा ७ विकेट गुमाएर २८९ रन बनाएको थियो । भारतको लागि शिखर धवनले १०९ रनको शतकीय पारी खेले । त्यस्तै कप्तान विराट कोहलीले ७५ रनको योगदान दिदा महेन्द्र सिंह धोनीले अविजित ४२ रन जोडे । दक्षिण अफ्रिकाका कागीसो राबडा र लुंगी नेगीदीले समान दुई दुई विकेट लिए ।
घरेलु टोली दक्षिण अफ्रीकाले भारतविरुद्ध चौथो खेलमा पहिलो जित निकालेको हो । अघिल्ला तीन खेलमा पराजय बेहोरेको दक्षिण अफ्रीका ६ खेलको सिरिजमा अझै ३ – १ ले पछि रहेको छ ।
