नेपाली राष्ट्रिय टोलीका लेग स्पिनर सन्दिप लामिछानेले इन्डियन प्रिमियर लिग (आईपीएल) क्रिकेटको डेब्यु खेलमा उत्कृष्ट बलिङ प्रदर्शन गरेका छन् । रोयल्स च्यालेन्जर्स बैंग्लोरविरुद्धको खेलमा डेब्यु गरेका दिल्ली डेयरडेभिल्सका सन्दिपले डेब्यु खेलमै १ विकेट लिएका छन् ।

Advertisement

दिल्लीस्थित फिरोज साह कोट्ला क्रिकेट स्टेडियममा जारी खेलमा सन्दिपले बैंग्लोरविरुद्ध आफ्नो पुरै ४  ओभर बलिङ गर्दै १ विकेट लिएर २५ रन खर्चिए । सन्दिपले आफ्नो दोस्रो ओभरमा बैंग्लोरका पार्थिव पटेललाई ६ रनमा आउट गरेका थिए  । सन्दिपले ४ ओभरमा १ छक्का र २ चौका मात्र खाएका थिए ।

निकै उत्कृष्ट प्रदर्शन गरेका सन्दिपले भारतीय कप्तान विराट कोहली, दक्षिण अफ्रिकाका एबी डि भिलियर्स जस्ता ब्याट्सम्यानविरुद्ध बलिङ गरेका थिए । सन्दिपको बलमा डि भिलियर्सले एक छक्का प्रहर गरेका थिए ।

आईपीएल क्रिकेटको १२ औं खेलमा डेब्यु गर्न पाएका सन्दिपले ब्याटिङ गर्न भने पाएनन् । नेपाली यू – १९ टोलीका कप्तान समेत रहेका आईपीएल टोलीमा पर्ने पहिलो नेपाली खेलाडी  हुन् । दिल्लीको प्ले अफ सम्भावना सकिएपछि सन्दिपले पहिलोपटक खेल्ने मौका पाएका हुन् ।

प्रतियोगिताबाट बाहिरिसकेको दिल्लीले ११ खेलबाट मात्र ६ अंक जोडेको छ । पुछारमा रहेको दिल्लीले ११ खेलमा ८ हार र ३ जित निकालेको छ । ६ अंक जोडेको बेंगलोर सातौं स्थानमा छ । बैंग्लोर आजको खेल जित्दै प्ले अफमा पुग्ने सम्भावना कायम राख्न चाहन्छ ।

दिल्लीले दिएको १८२ रनको लक्ष्यसहित जवाफी ब्याटिङ गरिरहेको बैंग्लोरले १५ ओभरको समाप्तिमा ३ विकेट गुमाएर १४७ रन जोडेको छ ।


प्रतिक्रिया लेख्नुहोस