एजेन्सी । रसिया विश्वकप फुटबलअन्तर्गत आज समुह ‘ई’ को ब्राजिल र कोस्टारिकाबीच प्रतिस्पर्धा हुँदैछ । रसियाको सेन्टपिटर्सवर्ग रंगशालामा ब्राजिल र कोस्टारिकाबीचको खेल हुन लागेको हो ।
नेपाली समयअनुसार आज राति ५ बजेर ४५ मिनेटमा खेल हुनेछ । यसअघि समूह चरणको पहिलो खेलमा दुवै टिमले एक—एक खेल खेलिसकेका छन् । ब्राजिलले स्वीट्जरल्याण्डसँग १—१ गोलको बराबरी खेलेको थियो । यता, कोस्टारिका भने सर्बियासँग १—० गोलले पराजित भएको थियो ।
नकआउट चरणमा पुग्ने सम्भावनालाई बलियो बनाउनका लागि आजको खेल ब्राजिलाई जित्नैपर्ने दबाब छ । यता, कोष्टारिका आजको खेलमा पनि पराजित भए समूह चरणदेखि नै बाहिरिने खतरा छ ।
हेड टु हेड
अहिलेसम्म ब्राजिल र कोस्टारिकाको ९ पटक भेट भइसकेको छ । जसमा ८ खेलमा ब्राजिलले जितेको थियो भने १ खेलमा ब्राजिल कोस्टारिकासँग पराजित भएको थियो ।
सन् १९५६ मा पहिलो पटक भएको खेलमा ब्राजिलले कोस्टारिकालाई ७—१ गोलले पराजित गरेको थियो । तर, सन् १९६० मा ब्राजिललाई कोस्टारिकाले ३—० गोलले पराजित गरेको थियो । सन् १९६० भएको अर्को खेलमा ब्राजिलसँग कोस्टारिका पराजित भएको थियो ।
सन् १९९० र २००२ मा भएको विश्वकपमा ब्राजिलसँग कोस्टारिका पराजित भएको थियो । त्यसैगरी, १९९२, २०११ र २०१५ मा भएको मैत्रीपूर्ण खेलमा ब्राजिलले कोस्टारिकालाई पराजित भएको थियो ।
त्यस्तै, सन् १९९७ र २००४ मा भएको कोपा अमेरिका कपमा ब्राजिलले कोस्टारिकालाई पराजित गरेको थियो ।
