बिराटनगर भदौ १४ , गएरातिदेखि पूर्वक्षेत्रमा अविरल परेको पानीले जलमग्न भएका कारण उद्योग तथा कारखानाहरुको उत्पादन प्रभावित भएको छ ।
विराटनगरको उत्तरी सिमाना नजिकै रहेको मोरङको बुढीगंगास्थित आरती स्ट्रीप्स लगायत आसपासको क्षेत्रमा रहेका उद्योगहरुको उत्पादन प्रभावित भएको छ । उद्योग वरिपरि तथा उद्योगको मिल मेशिनरी राखिएकै ठांउ जलमग्न भएपछि ती उद्योगहरुको उत्पादन प्रभावित भएको हो । उद्योग भित्रै पानी पसेपछि प्रोडक्सन रोकिएको आरती स्ट्रिप्सका कर्मचारी नागेन्द्र कुमारले जानकारी दिनुभयो ।
कर्मचारी आवासमा समेत पानी पसेपछि उद्योग परिसरमा रहेका कर्मचारीहरु आवासको माथिल्लो तल्लामा सरेका छन । गएको बर्ष आएको बाढीजस्तै अवस्था सृजना भएको सो उद्योगका कर्मचारीले बताएका छन । सो उद्योगले रंगीन तथा सादा कर्कटपाता उत्पादन गर्दै आएको छ । सो उद्योग छेउछाउका अन्य उद्योगमा समेत पानी पसेका कारण उत्पादन प्रभावित भएको छ ।
