केशब भट्टराई
ताप्लेजुङ कार्तिक २४ – हिमाली जिल्ला ताप्लेजुङका तीन वटा पर्यटकीय गन्तव्यहरु पर्यटन मन्त्रालयको सूचीमा समाहित भएका छन् ।
पर्यटन मन्त्रालयले सर्वजनिक गरेको देशभरका १ सय वटा गन्तव्यमध्ये ३ वटा ताप्लेजुङका पर्यटकीय गन्तव्य पनि परेका हुन् । पूर्वको चर्चित धार्मिक तथा पर्यटकीयस्थल पाथिभरा, मिक्वाखोला गाउँपालिका वडा नम्बर ४ को सुन्दर झरना फुङफुङ्गे र ताप्लेजुङ र पाँचथरको सीमानामा रहेको सुन्दर पोखरी, ‘तिम्बुङ पोखरी’लाई पर्यटकीय गन्तव्यस्थलको रुपमा राखिएको छ ।
पाथिभरा र फुङफुङ्गे झरनालाई विकास गरिनु पर्ने गन्तव्यका रुपमा राखिएको छ । तिम्बुङ पोखरीलाई विकास गर्नु पर्ने गन्तव्यका रुपमा राखिएको छ । पाथिभारा देवी संरक्षण तथा सम्बद्धन समितिले पाथिभरामा वार्षिक साढे तीनलाख धार्मिक तथा अन्य पर्यटक आउने गरेको जनाएको छ । ताप्लेजुङ सदरमुकामको फुङलिङ नगरपालिकामा रहेको गन्तव्यमा तीर्थ यात्रीहरु धेरै आउने गरेका छन् ।
सबैभन्दा धेरै दसैँको नौरथा लागेदेखि तिहार पछिसम्म अत्यधिक मात्रामा तीर्थयात्रीहरु आउने गरेका छन् । ताप्लेजुङको फुङलिङ बजारदेखि २१.५ किलोमिटमा पाथिभराको चुचुरो पुग्न सकिन्छ । सदरमुकामबाट सुकेटार विमास्थलसम्म ८ किलोमिटर कालोपत्रे गरिएको छ भने सुकेटरदेखि काफ्ले पाटीसम्मको ९ किलोमिटर कच्ची सडक रहेको छ । पाथिभरा चुचुरो पुग्न काफ्ले पाटीदेखि ४.५ किलोमिटर हिँड्नु पर्ने छ ।
पाथिभरामा ५ महिना हिउँ पर्ने भएकाले हिउँ खेल्ल पनि पर्यटकहरु आउने गर्छन् । कञ्चनजंघा, मकालु, कुम्भकर्णलगायतका हिमशृखलाहरुले पाथिभरालाई अझै पर्यटकीय गन्तव्यको रुपमा स्थापित गरेको छ । ३ हजार ७ सय ९४ मिटरको उचाईमा रहेको पाथिभराले हजारौं मानिसको रोजिरोटी जुटाई दिएको छ ।
ताप्लेजुङको पश्चिमी गाउँ मिक्वाखोला गाउँपालिकाको साँवामा रहेको फुङफुङ्गे झरना बाह्रै महिना उस्तै देखिन्छ । तर त्यहाँसम्म मोटरबाटो भने पुगेको छैन् ।
त्यो झरना भएको मिक्वाखोला गाउँपालिकाको केन्द्र साँवामा समेत मोटरबाटो पुगेको छैन् । ठूलो छाँगो फुङफुङ गरेर झर्ने भएकाले पनि झरनाको नाम फुङफुङ्गे रहन गएको किबतन्ती रहेको छ ।
ताप्लेजुङको पूर्वी गाउँपालिका, सिरिजंघा गाउँपालिकामा रहेको तिम्बुङ पोखरी झण्डै ४४ सय मिटर उचाईमा रहेको छ । यस क्षेत्रमा विभिन्न जडिबुटी लगायत, विश्वमा दुर्लभ वन्यजन्तु समेत पाइन्छ । हिमाली क्षेत्र भएकाले फाटिला चौरहरुले सञ्चित तिम्बुङ पोखरी अहिलेसम्मकै उच्च गन्तव्यमा पर्ने बताइन्छ ।
यी गन्तव्यहरुलाई विकसित गरी पर्यटकीय अगमनमा वृद्धि गर्ने हो भने देशलाई नै ठूलो आर्थिक टेवा पुग्ने छ । (उज्यालो)
