ताप्लेजुङ, ५ वैशाख। ताप्लेजुङको छुट्टाछुट्टै स्थानबाट प्रहरीले १० नाल भरुवा बन्दुक बरामद गरेको छ । प्रहरी चौकी शिवाबाट खटिएको प्रहरीले फक्तालुङ गाउँपालिका-१ सावादिन जंगलमा बेवारिशे अवस्थामा ३ नाल भरुवा बन्दुक फेला पारेकाे हाे ।
त्यसैगरी प्रहरी चौकी निगुरादिनबाट खटिएको प्रहरी टोलीले आठराई त्रिवेणी गाउँपालिका-१ जंगलमा लुकाई राखेको १ नाल, इलाका प्रहरी कार्यालय दोभानबाट खटिएको प्रहरी टोलीले आठराई त्रिवेणी गाउँपालिका-२ फुलवारी स्थित ओडारे जंगलमा २ नाल, इलाका प्रहरी कार्यालय तेल्लोकबाट खटिएको प्रहरी टोलीले श्रीजंगा गाउँपालिका-३ कुन्जरीमा लुकाई राखेको ३ नाल भरुवा बन्दुक बरामद गरेकाे प्रहरीले जनाएकाे छ । प्रहरीले श्रीजंगा गाउँपालिका सिकैचा बस्ने बर्ष ४० को तुलाराम काङबाङले १ नाल लाईसन्स सहितको भरुवा बन्दुक प्रहरीलाई बुझाएको जिल्ला प्रहरी कार्यालय ताप्लेजुङले जनाएको छ ।
