काठमाडौं जेठ २० । इंग्ल्याण्डमा जारी एकदिवसीय विश्वकप क्रिकेटमा बंगलादेशले विजयी सुरुवात गरेको छ ।गएराती भएको खेलमा बलियो टिम दक्षिण अफ्रीकालाई २१ रनले पराजित गर्दै बंगलादेशले सुखद सुरुवात गरेको हो ।
खेलमा बंगलादेशले दिएको ३ सय ३१ रनको फराकिलो लक्ष्यसहित जवाफी ब्याटिङ गरेको दक्षिण अफ्रीकाले ५० ओभरमा ८ विकेट गुमाएर ३ सय ९ रन मात्र बनाउन सक्यो ।
उसका लागि कप्तान फाफ डु प्लेसिसले ६२ रन जोडेपनि टोलीको हार टार्न सकेनन् । बलिङतर्फ बंगलादेशका मुस्ताफिजुर रहमानले ३ विकेट लिए ।
यसअघि टस हारेर पहिले ब्याटिङ गरेको बंगलादेशले ५० ओभरमा ६ विकेट गुमाएर ३ सय ३० रन बनाएको थियो ।उसका लागि मुस्फिकर रहमानले ७८ रन जोड्दा शाकिब अल हसनले ७५ रनको योगदान दिए ।
जितसँगै बंगलानदेशले विश्वकप क्रिकेटको १२ औं संस्करणमा शानदार सुरुवात गरेको छ । दक्षिण अफ्रीका भने लगातार दोस्रो खेलमा पराजित भएको छ ।
प्रतियोगिताको उद्घाटन खेलमा दक्षिण अफ्रिकालाई इंग्लण्डले हराएको थियो । प्रतियोगितामा आज इंग्लण्ड र पाकिस्तान भिड्नेछन् ।
पहिलो खेलमा इंग्लण्ड विजयी भएको थियो भने पाकिस्तानलाई वेष्ट इंडीजले हराएको थियो ।
