काठमाडौं । अफगानिस्तानलाई हराउँदै बंगलादेशले इङ्ल्याण्डमा जारी आईसीसी एकदिवसीय विश्वकप क्रिकेटको सेमिफाइनलमा पुग्ने सम्भावना बलियो पारेको छ ।
साउथह्याम्पटनमा गएराति भएको खेलमा अफगानिस्तान ६२ रनले पराजित भयो । जारी प्रतियोगितामा बंगलादेशको यो तेस्रो जित हो ।
रोजबल क्रिकेट मैदानमा बंगलादेशले दिएको २ सय ६३ रनको लक्ष्य पछ्याएको अफगानिस्तान ४७ ओभरमा अलआउट हुँदै २ सय रनमा समेटियो ।
अफगानिस्तानलाई सस्तैमा रोक्न बंगलादेशका शकिब अल हसनले ५ विकेट लिए । शकिबले १० ओभरमा २९ रन खर्चेर ५ विकेट लिएका हुन् ।
योसँगै शकिब एकदिवसीय विश्वकपमा ५ विकेट लिने पहिलो बंगलादेशी खेलाडी बनेका छन् ।
यसअघि टस हारेर पहिले ब्याटिङ गरेको बंगलादेशले ५० ओभरमा ७ विकेट गुमाएर २ सय ६२ रन बनाएको थियो । उसका लागि मुस्फिकर रहिमले ८३ रन जोड्दा शकिबले ५१ रन बनाए ।
जितसँगै बंगलादेशले शीर्ष चारमा पुग्दै सेमिफाइनल पुग्ने सम्भावना कायम राखेको छ ।
तेस्रो जितसँगै पाँचौ स्थानमा उक्लिएको बंगलादेशले ७ खेलबाट ७ अंक जोडेको छ । अफ्गानिस्तान भने सबै ७ खेलमा पराजित भएको छ ।
विश्वकप क्रिकेटमा आज इङ्ल्याण्ड र अस्ट्रेलिया भिड्नेछन् ।
६ खेलबाट १० अंक जोडेको अस्ट्रेलिया अंक तालिकाको दोस्रो स्थानमा रहँदा ८ अंक जोडेको आयोजक इङ्ल्यान्ड चौथो स्थानमा छ ।
