विराटनगर, ११ असार । विराटनगर महानगरपालिकाले चालू आर्थिक वर्षको ११ महीनामा लक्ष्यको आधा मात्र राजस्व असुली गरेको छ । चालू आर्थिक वर्षमा महानगरपालिकाले ५४ करोड ३ लाख राजस्व असुली गर्ने लक्ष्य राखेकोमा हालसम्म ३० करोड ६३ लाख राजस्व असुली गरेको हो ।
गत साउनदेखि वडास्तरबाट कर तथा राजस्व संकलन गर्ने निर्णय भएअनुसार कर असुली हुँदै आएको छ । तर कर तिर्न आएका सेवाग्राहीबाट घूस लिने कर्मचारीलाई जनप्रतिनिधिले नै रंगेहात पक्राउ गरेपछि २६औं कार्यपालिका बैठकले कुनै पनि कर महानगरबाट नलिने निर्णय गरेको थियो । स्थानीय तहमा सातओटा शीर्षकमा राजस्व असुली हुने गरेको छ । घर–जग्गा कर, व्यवसाय कर, विज्ञापन कर, सवारी पार्किङ कर, दण्ड जरीवाना, धरौटी जफत र नक्सा पास दस्तुरसहित विविध शीर्षकको कर तथा दस्तुर वडामा बुझाउनुपर्ने व्यवस्था आर्थिक ऐनमा गरिएको छ ।
महानगरपालिकाका वित्तीय व्यवस्थापन महाशाखाका प्रमुख राजेन्द्र प्रधानले करदाता नआएकाले कर असुली न्यून भएको बताए । चालू आर्थिक वर्षमा विनायोजना करको लक्ष्य बढाएकाले प्रभावित भएको हुन सक्ने उनको भनाइ छ । महानगरपालिकाले सिलिङ तोकेर वडा अध्यक्षहरूलाई कर एवं दस्तुर लिन जिम्मेवारी दिएको बताइएको छ । तर पनि कर असुली न्यून भएपछि प्रमुख प्रकाशकीय अधिकृतको संरक्षणमा वित्तीय व्यवस्थापन महाशाखा, राजस्व शाखा र वडा अध्यक्षसहितको अनुगमन समिति बनाइएको थियो ।
महानगरपालिकाले चालू आर्थिक वर्षमा घरजग्गा कर, व्यवसाय कर, विज्ञापन कर, सवारी पार्किङ कर, दण्ड जरीवाना, धरौटी जफत र नक्सा पास दस्तुरसहित विविध आय शीर्षकबाट लक्ष्यभन्दा १ तिहाइ कम राजस्व संकलन गरेको गरेको छ । लीलामी विक्री, भाडा तथा बहालबाट आय, धरौटी जफत, पेश्की फिर्ता, स्थानीय कर, दस्तुर, विक्री शीर्षकमा न्यून कर संकलन भएको तथ्यांकले देखाएको छ ।
महानगरले व्यवसाय कर ७ करोड असुली गर्ने लक्ष्य लिएकोमा हालसम्म २ करोड २४ लाखमात्र असुली गरेको छ । त्यस्तै घरबहाल करको लक्ष्य ६ करोड रहेकोमा २ करोड १४ लाख असुली भएको छ । नक्सापास दस्तुरबाट ६ करोड उठाउने लक्ष्य थियो, जसबाट ४ करोड १५ लाख ८४ हजार संकलन भएको छ । महानगरपालिकाका वित्तीय व्यवस्थापन महाशाखाका प्रमुख प्रधानले प्रधानमन्त्री रोजगार कार्यक्रममा निवेदन दिएका बेरोजगार युवालाई महानगरपालिका प्रत्येक वडामा तीनजनाका दरले राजस्व अभिवृद्धि सर्भेक्षण टोली सदस्यका रूपमा परिचालन गरिएको जानकारी दिए ।अभियान दैनिकबाट
