विराटनगर,१९ असार। विराटनगर महानगरपालिकाले जनप्रतिनिधिलाई पोशाकका लागि १० हजार रुपैयाँ उपलब्ध गराउने भएको छ ।
जनप्रतिनिधिहरु सुबिधाभोगी भएको गुनासो आइरहेको बेला महानगरको चौंथो नगरसभाले सबै जनप्रतिनिधिका लागि पोशाक खर्च भन्दै प्रतिव्यक्ति दश हजार दिने निर्णय गरेको हो । प्रशासनिक खर्च बढाउने क्रममा महानगरले जनप्रतिनिधिको मोवाइल खर्च भन्दै मासिक १५०० दिने निर्णय पनि गरेको छ ।
१० वडा रहेको विराटनगर महानगरपालिकामा १०० जनप्रतिनिधिहरु छन् । १०० जनाको पोशाककलागि मात्र १० लाख विनियोजन गरेका हुन् ।
भर्खरै सम्पन्न नगरसभाबाट प्रत्येक सदस्यलाई १० हजार रुपैयाँका दरले पोशाक भत्ता दिने निर्णय पारित भएको विराटनगर महानगरपालिकाका मेयर भीम पराजुलीले जानकारी दिए ।
अन्य स्थानीय तहले पनि बजेट विनियोजन गरेका कारण विराटनगरले पनि बिनियोजन गरेको उनको भनाइ छ । महानगरका मेयर र उपमेयरले पोशाकका लागि छुट्याएको रकम नलिने उनले बताए ।
विराटनगर महानगरपालिकामा कर्मचारीलाई जस्तै जनप्रतिनिधिहरुलाई पनि महानगरले पोशाक तोक्ने गरी पोशाक भत्ता विनियोजन गरिएको पराजुलीले बताए ।
जनतालाई दुःख, जनप्रतिनिधिलाई सुबिधा
महानगरपालिकाका जनप्रतिनिधि जनताको सुबिधा वृद्धिका लागि भन्दा पनि आफ्नो सुविधा कसरी बढाउन केन्दि्रत भएको उपभोक्तावादी संस्था पब्लिक फोरम विराटनगरका अध्यक्ष उत्तम ढुंगेल बताउँछन् । जनताले तिरेको करमाथि खेलवाड गर्दै जनप्रतिनिधि फजुल खर्च बढाउन केन्दि्रत भएको उनको गुनासो छ । अनलाईन खबरबाट
