विराटनगर, १९ असार । मोरङको सुन्दरहरैंचा नगरपालिका–३ स्थित गछिया खोलाको पुलमा टिप्परको ठक्करबाट बिहीबार साँझ एक जना साइकल यात्रीको मृत्यु भएको छ ।
पूर्वबाट पश्चिमतर्फ आउँदै गरेको ना १ क ८४०६ नम्बरको टिप्परले सोही दिशाबाट आउँदै गरेको साइकललाई ठक्कर दिएको हो । दुर्घटनामा सुन्दहरैंचा–६ का ६५ वर्षीय बलराम राईको मृत्यु भएको मोरङ प्रहरीका प्रवक्ता डीएसपी घनश्याम श्रेष्ठले जानकारी दिए । ठक्करबाट घाइते भएका साइकल यात्री राईको उपचारका क्रममा विराटनगरको न्युरो अस्पतालमा साँझ ७ बजे मृत्यु भएको हो ।
साइकल आफै अनियन्त्रित भएर पल्टिएपछि तीव्र गतिमा रहेको मिक्स गिट्टी लोड गरेको टिप्परले ठक्कर दिएको प्रहरीले जनाएको छ । टिप्पर र चालक ३० वर्षीय विष्णुकुमार चौधरीलाई नियन्त्रणमा लिएर घटनाको अनुसन्धान सुरु गरिएको डीएसपी श्रेष्ठले बताए ।
