प्रेम देवान
विराटनगर, २६ असार । विराटनगरमा केहीदिन देखि भएको अबिरल बर्षाका कारण विभिन्न स्थान डुवानमा परेका छन् । विराटनगरको दक्षिणी भाग मिल्स एरियाका अधिकांश घरहरुमा पानी पसेको छ । बिराटनगरमा निर्माणधिन विकासको काम ५ बर्षदेखि पुरा नहुँदा यस बर्ष पनि सर्बसाधारणले डुवानको समस्या झेलेका छन् ।
ढल निकास नहुँदा कोशी अञ्चल अस्पताल डुवानमा परेको छ । मंगलबार रातिदेखि परेको वर्षा र पानीको सतह बढेपछि बुधबार र बिहीबार कोशी अस्पतालको परिसर डुवानमा परेको थियो । सडकको पानी अस्पताल भित्र पस्दा औषधि पसलसहितका प्रशासनिक भवनमा समेत पानी पसेर जलमग्न भएको छ ।
लगातारको वर्षा र अस्पताल भित्र पसेको पानीको निकास हुन नसक्दा आकस्मिक कक्ष भित्र पनि पानी पस्न सक्ने खतरा बढेपछि पम्पसेटको माध्यामबाट पानी बाहिर निकालिएको छ । जमेको पानीलाई सशस्त्र प्रहरी र अस्पतालको सुरक्षा गार्डको सहयोगमा पम्पसेटको माध्यामबाट बाहिर निकालिएको हो । 
जमेको पानी निकाल्न सशस्त्र प्रहरी बल ३ नम्बर गढ कंकालिनी मोरङका सई केदार कटुवालको नेतृत्वमा आएको प्रहरी टोलीले कोशी अञ्चल अस्पताल परिसरमा जमेको पानी पम्पसेटबाट निकालिएको थियो ।
ढलको निकास नगरी सडक उचो बनाईदिँदा अस्पताल भित्र पानी पसेको हो । पानीको निकास नहुँदा अस्पतालमा उपचार गराउन आएका सेवाग्राहीलाई समेत समस्या भएको छ । ‘उपचारका लागि आएका बिरामी तथा अस्पतालका कर्मचारी जुत्ता खोलेर अस्पताल भित्र पस्नु पर्ने अबस्था आएको छ, अस्पतालका मेडिकल सुपरिटेण्डेन्ट डा रोशन पोखरेलले भने । 
विराटनगरको बजार क्षेत्र निर्माणको चरणमा रहेका कारण पानी पर्दा डुबानमा परेको विराटनगर महानगरपालीकाका मेयर भीम पराजुली बताउँछन् । पानी जमेपछि बजार क्षेत्रमा स्काभेटर प्रयोग गरेर बन्द भएका ठाउँहरु खोल्ने काम भइरहेको उनको भनाइ छ । महानगरपालिका निर्माणको चरणमा रहेकाले सर्तक रहन उनले आग्रह गरे । 
दिउँसो अस्पताल भित्रको पानीको निकासका लागि एकातर्फ सशस्त्र प्रहरीले पम्पसेट लगाएर पानी बाहिर फाल्ने काम भईरहेको थियो भने अर्को तर्फ महानगरपालिकाले डोजर लगाएर नला सफा गर्ने काम गरेको थियो । तर साँझदेखि फेरी बर्षा शुरु भएसँगै पानी जम्ने खतरा उत्तिकै रहेको छ ।
