७ श्रावण २०७६, मंगलवार

विराटनगरको जेनिथ कलेजका विद्यार्थीले जिते मार्केटिङ एक्सिलेन्स अवार्ड

विराटनगर असार २८,  विराटनगरको जेनिथ इन्टरनेशनल कलेजले नेपालभरीका कलेजलाई उछिन्दै मार्केटिङ एक्सिलेन्स अवार्डको फस्ट रनरअप उपाधि जितेको छ । वल्र्डलिंक कम्युनिकेशनले काठमाडौंमा आयोजना गरेको ‘मार्केटिङ एक्सिलेन्स कम्पिटिसन २०१९’ मा जेनिथका विद्यार्थीहरूले उपाधिसहित एक लाख रूपैयाँ जितेका छन् ।

 

विद्यार्थीहरूले बजारमा चलिरहेका इन्टरनेट कम्पनी र उनीहरूले बेच्दै आएका विभिन्न ब्रोडब्याण्ड प्याकेजहरूको प्रभावकारिता अध्ययन गरी नयाँ प्याकेजहरू निर्माण गरेका थिए । बाणिज्य संकायमा अध्ययन गर्ने उनीहरूले तल्लो तहमा गएर बजार व्यवस्थापनको वास्तविकता अध्ययन गरेका थिए ।

प्रतियोगितामा नेपालभरीका २० वटा कलेजमध्ये फाइनलका लागि आठवटा कलेज भिडेका थिए । काठमाडौं बाहिरका मात्रै १२ वटा कलेज छानिएकोमा जेनिथले फस्ट रनरअप जितेको सहभागी विद्यार्थी तनुज चौधरीले बताए । प्रदेश १ मा जेनिथसहित पूर्वाञ्चल विश्वविद्यालय स्कुल अफ म्यानेजमेन्टका विद्यार्थीहरूले प्रतिस्पर्धा गरेका थिए ।

बजारमा कस्तो इन्टरनेट चलिरहेको छ र कस्ता उत्पादन विक्री हुन सक्छन् भन्ने अध्ययन गरी प्रतिस्पर्धामा भाग लिएको विद्यार्थी स्वेता श्रेष्ठ मास्केले बताइन् । उनले आफ्नो समूहले तयार पारेको प्रतिवेदनका आधारमा फस्ट रनरअपको उपाधी प्राप्त गरेको जानकारी दिइन् ।

विराटनगरको १९ वटै वडामा रहेका इन्टरनेट प्रयोगकर्तालाई भेटेर तयार पारेको प्रतिवेदन तनुज र स्वेतासहित सिद्धार्थ पोद्दार, सोनम यादव र राजु गुप्ताले समूह बनाएर प्रस्तुतिकरण गरेका थिए ।

सम्बंधित खबरहरु


प्रतिक्रिया लेख्नुहोस