विराटनगर, १३ साउन ।
स्पेन पठाउने भन्दै एउटै परिवार भित्रका नाता सम्बन्ध पर्ने एक व्यक्तिले छ जना व्यक्तिसँग मोटो रकम लिएर ठगी गरेका छन् । आफ्नै परिवारका सदस्यबाट २० लाख १८ हजार पाँच सय रुपैयाँ पैसा असुलेर विराटनगरका एक युवा फरार भएका हुन् ।
विराटनगरको पिचरा घर भई सुनसरीको इटहरीस्थित कान्छी चोकमा बस्दै आएका २४ वर्षीय रोशन श्रेष्ठ गैली वैदेशिक रोजगारीका लागि स्पेन पठाइदिने भन्दै पैसा उठाएर फरार भएका हुन् । उनी एक बर्षदेखि सम्पर्क बिहिन भएका छन् । गैलीका विरुद्ध सोमबार श्रम तथा रोजगार कार्यालय विराटनगरमा उजुरी परेको छ ।
ठगी गरेको पुष्टि भएपछि कार्यालयले गैलीलाई पक्राउ गर्न पूर्जी जारी गर्दै प्रहरी र अन्य सरकारी निकायमा पठाएको छ । उनले झापा बुद्धशान्ति गाउँपालिका–३ का हेमबहादुर माझी, टेकबहादुर माझी, विनोद माझी, अरुण माझी, झापा भद्रपुर नगरपालिका–३ की सीमा तामाङ र इलाम करफोकका अदित तामाङसँग पैसा उठाएका हुन् । पीडितहरुले ठगि गरेको पर्याप्त प्रमाणसहित उजुरी दिएको र ठगी गरेको पुष्टि पनि भएको वरिष्ठ श्रम अधिकृत प्रेमप्रसाद सञ्जेलले बताए ।
‘उजुरी परेपछि अनुसन्धान थालिएको छ,’ सञ्जेलले भने, ‘गैलीका नाममा पक्राउ पूर्जी जारी गर्दै देश भरीका प्रहरी कार्यालय र विभिन्न सरकारी निकायमा पठाइसकिएको छ ।’ भागेर विदेश जान सक्ने सम्भावनालाई ध्यानमा राख्दै त्यसतर्फ पनि रोक लगाइएको सञ्जेलको भनाइ छ ।
झापा बुद्धशान्तिका लोकबहादुर माझीले पीडितहरु सबै आफ्ना भतिज, नाति र नातिनी पर्ने बताए । श्रम कार्यालयमा भेटिएका उनले आफू धेरै वर्ष स्पेन बसेको र त्यहाँबाट छ जनाका लागि भिसा लिएर आएको भन्दै छलेर र प्रलोभनमा पारेर गैलीले ठगी गरेको बताए । उनका अनुसार सबैलाई बैंक र आईएमई मार्फत रकम जम्मा गर्न लगाइएको थियो ।
लोकबहादुरले दुई महिना भित्रमा विदेश पठाउने भन्दै २०७५ साउनमा सबैसँग गैलीले पैसा लिएको बताए । आधा पैसा यहीं र आधा स्पेन पुगेर काममा लागेपछि दिनु भन्दै एक जनासँग लगभग साढे तीन लाख रुपैयाँ उठाएको उनको भनाइ छ । गैलीले स्पेन जानलाई एक जना बराबर सात लाख रुपैयाँ लाग्ने बताएको पीडितले श्रममा दिएको उजुरीमा उल्लेख छ ।
