विराटनगर। विराटनगर महानगरपालिकाको बिमानस्थल पस्चिमको ईक्राईका ७० बर्षिय रतनलाल चौधरीलाई आफ्नो घर र जमिन विमानस्थलले कहिले लिने हो भन्ने चिन्ता छ । विमानस्थल बिस्तार गर्दा आफ्नो घर पनि पर्छ भन्ने चिन्ता एकातिर भए पनि आफ्नो ठाउँमा विकास हुने कुराले उहाँलाई उत्साहित पनि बनाएको छ । विमानस्थल बढाउँदा राम्रो हुन्छ भन्ने स्थानीयबासिन्दा अरु पनि धेरै छन् । 
बिमानस्थल बढाउँदा विकास हुने आशा बोकेका उनीहरु कोही आफ्नो घरसम्म नै बिमानस्थल विस्तार हुन्छ भन्नेमा छन् भने कोही आफ्नो घरसम्म विस्तार हुँदैन भन्नेमा ढुक्क छन् । स्थानीय उर्मिला चौधरी भने आफ्नो घर बिमानस्थलमा नपर्ने बताउँनुहुन्छ । तर यदी आफ्नो घर पर्यो भने पनि छाड्न तयार रहेको उहाँको भनाई छ ।
उर्मिला र रतनलाल जस्ता धेरैलाई बिमानस्थल बढ्यो भने कहाँसम्म पुग्ने हो भन्ने अन्यौल छ । विराटनगर विमास्थललाई क्षेत्रीय अन्तर्राष्ट्रिय बनाउने कुराले स्थानीयबासिन्दालाई जस्तै वायु सेवा कम्पनीका प्रतिनिधिलाई पनि खुशी बनाएको बुद्धएयर विराटनगरका म्यानेटर कौशल भण्डारीले बताउनुभयो ।
विमानस्थललाई क्षेत्रीय अन्तराष्ट्रिय विमानस्थल बनाउनको लागि डिपिआर बनाउने काम पनि पुरा भईसकेको छ । एक बर्ष अगाडि मात्र साढे चार बिगाहा जग्गा अधिग्रहण गरेको नेपाल नागरिक उड्ययन प्राधिकरणले विमानस्थल बिस्तार भएमा पस्चिमको केशल्या खोलासम्म करिब १५० बिगाहा जग्गा अधिग्रहण गर्नुपर्ने छ । तर त्यसको लागि मन्त्री परिषदको बैठकबाट नै स्वीकृत भएर आउनु पर्ने नागरिक उड्ययन प्राधिकरण विराटनगरका प्रमुख टेकनाथ सिटौला बताउनुहुन्छ । विराटनगर विमानस्थल विस्तारको कुरा उठेको धेरै भैसकेको छ । तर सरकारको तर्फबाट डिपिआर स्वीकृत गरेर काम अगाडि बढाउन ढिला भएको छ । 
विराटनगर बिमानस्थलको विस्तारको लागि २५ सय मिटर वा ३ हजार मिटर कति बढाउने भन्ने डिपिआरमा उल्लेख छ । अहिले १५ सय मिटर रहेको बिमानस्थल २५ सय मिटर वनाउँदा १५० बिगाहा जग्गा अधिग्रहण गर्नु पर्नेछ भने ३ हजार मिटर बनाउँदा २ सय ५० बिगाहा जग्गा अधिग्रहण गर्नुपर्ने छ । यो जग्गा अधिग्रहण गर्दा राज्यको मुआब्जाका लागि मात्र करिब ४ अर्ब बढी खर्च हुनेछ । विराटनगरबाट केही समय अगाडी गएको दवाव समुहलाई संस्कृति पर्यटन तथा नागरिक उड्ययन मन्त्री योगेश भट्टराईले असोज महिना भित्र नै डिपिआर स्वीकृत गर्ने बचन दिनुभएको थियो । तर डीपीआर अझै स्वीकृत भैसकेको छैन ।
