विराटनगर । मोरङको उर्लाबारी नगरपालिका–४ सिसौलीमा जंगली हात्तीले बिहीबार राति चारवटा घर भत्काइदिएको छ । 
मेघराज थापा, कविता विक, रीता विक र यामबहादुर धिमालको घर भत्काएर क्षति पुर्याएको इलाका प्रहरी कार्यालय उर्लाबारीका प्रहरी निरीक्षक सुवास राईले बताए । उनका अनुसार कर्कट पाता र फुसको छानो तथा टाटीको बेरा भएका एक तले घरहरु हात्तीले भत्काइदिएको हो । राति १२ बजेको समयमा गाउँ पसेका हात्तीले घर भत्काएर घरमा रहेका चामल र धान खाइदिएको तथा छरेर नष्ट गरिदिएको स्थानीयले बताएका छन् ।
घर भत्काएर क्षति पुर्याउने तीनवटा हात्ती स्थानीय बासिन्दा, नेपाल र सशस्त्र प्रहरी मिलेर बक्राहा खोलातिर लखेटेको प्रनि राईले बताए । हात्तीले वितण्डा मच्चाउँदा १० लाख बढीको क्षति भएको अनुमान गरिएको प्रहरीले जनाएको छ । त्यस्तै हात्तीले उर्लाबारी–३ मंगलबारेस्थित मदन भण्डारी प्रतिष्ठानको पूर्वतिरको गाह्रो पनि भत्काएर क्षति पुर्याएको छ । प्रहरी निरीक्षक राईले प्रतिष्ठानको पाँच मिटर गाह्रो हात्तीले भत्काइदिएको बताए ।
