पोखरा प्रिमियर लिग क्रिकेट (पीपीएल) मा आज (शुक्रबार) दुई खेल हुँदैछ ।
पहिलो खेलमा पोखरा पल्टन र बुटवल ब्लास्टर्स तथा दोस्रो खेलमा धनगढी ब्लुज र चितवन राईनोजबीच प्रतिस्पर्धा हुनेछ ।
पोखरा क्रिकेट मैदानमा हुने पहिलो खेलमा बिहान ९ बजे पोखरा र वुटबल भिड्नेछन् । डिफेन्डिङ च्याम्पियन पोखराले खेलेको तीन खेल मध्ये एउटामा मात्रै जीत हासिल गरेको छ । पोखरा अंक तालिकाको चौथो स्थानमा छ ।
पहिलो खेलमा काठमाडौं गोल्डेनलाई हराएको साविक विजेता दोस्रो खेलमा चितवनसंग पराजित हुन पुगेको थियो । बुटवल २ खेलमा १ मा जित निकाल्दै तालिकाको पुछारमा छ । बुटवलले सुपर ओभरमा काठमाडौँविरुद्ध पहिलो जीत हासिल गरेको थियो । त्यसैले अघिल्लो चरणको यात्रा तय गर्न बुटवललाई समेत जित महत्वपुर्ण छ ।
अर्को खेलमा दिउँसो सवा १ बजे धनगढी ब्लुज र चितवन राईनोज भिड्नेछन् । चितवन जारी प्रतियोगितामा एक मात्र अपराजित टिम हो ।
चितवन दुवै खेल जित्दै तालिकाको शीर्ष स्थानमा छ । पहिलो खेलमा विराटनगरमाथि रोमाञ्चक जित दर्ता गरेको धनगढी दोस्रो खेलमा ज्ञानेन्द्र मल्लको शतकसँगै काठमाडौंसँग पराजित भएको थियो । अघिल्लो चरणमा पुग्न धनगढीलाई जित निकाल्नै पर्ने दबाब छ ।
