पोखरा प्रिमियर लिग (पिपिएल) को उपाधि जित्न चितवन राइनोजले विराटनगर टाइटन्सलाई २०३ रनको विशाल लक्ष्य दिएको छ।
शनिबार पोखरा क्रिकेट मैदानमा टस हारेर पहिले ब्याटिङ गरेको चितवनले ५ विकेटको क्षतिमा २०२ रन जोड्यो।
पिपिएलको दोस्रो संस्करणमा यो दोस्रो ठूलो स्कोर हो। यसअघि काठमाडौं गोल्डेन्स वारियर्सले २०३ रन जोडेको थियो।
चितवनका लागि अनिलकुमार साह र रोहन मुस्ताफाले अर्धशतक प्रहार गरे।
अनिलले ३४ बलमा ३ चौका र ३ छक्का प्रहार गरे भने मुस्ताफाले ४३ बलमा ३ चौका र १ छक्का हिर्काए।
त्यसअघि कप्तान पारस खड्का ११ बलमा ४ चौका र १ छक्काको मद्दतमा २५ रनमा आउट भए भने बाबर हायतले ५ रन मात्र जोड्न सके।
आरिफ शेखले ११ बलमा १ चौका र २ छक्काको मद्दतमा १९ रन बटुले। करण केसीले ८ बलमा २ चौका र २ छक्काको मद्दतमा नटआउट २६ रन र सनी पटेलले ८ बलमा नटआउट १६ रन बटुले।
बलिङमा विराटनगरका पुनित मेहरा र मोहमद साइद आलामले २-२ विकेट लिए। किशोर महतोको नाममा १ विकेट रह्यो।
