काठमाडौं । स्वास्थ्य तथा जनसंख्या मन्त्रालयले विभिन्न अस्पतालमा भर्ना भएका बिरामीहरुले सम्भावित कोरोनाको नमुना परीक्षणका लागि काठमाडौं आउनु नपर्ने जनाएको छ ।
मन्त्रालयका प्रवक्ता डा. विकास देवकोटाले सम्भावित संक्रमितलाई अस्पतालले सिफारिस (रिफर) नगरी आइसोलेसनमा राखेर कोरोना भाइरस परीक्षणका लागि नमुना मात्रै राष्ट्रिय जनस्वास्थ्य प्रयोगशालामा पठाउन निर्देशन दिइएको बताए ।
उनले हालसम्म ६ सय १० जनाको नमुना परीक्षण गर्दा दुई जनाको पोजेटिभ देखिएकामा एक जना उपचारपछि फर्किएको र अर्का एक जनाको टेकु अस्पतालमा उपचार भइरहेको जानकारी दिए ।
हाल उक्त अस्पतालमा १६ जना संक्रमित भएको आशंकामा रहेकामध्ये पाँचजना आइसोलेसन र १० जना क्वारेन्टाइनमा रहेका छन् ।
प्रवक्ता डा.देवकोटाले सम्भावित संक्रमणको परीक्षणको दायरालाई बढाउँदै विपी कोइराला स्वास्थ्य विज्ञान प्रतिष्ठान धरान, धुलिखेल अस्पताल र वीर अस्पतलामा चाँडै नै नमुना परीक्षणको प्रबन्ध गरिने जानकारी दिए ।
