विराटनगर । विराटनगर महानगरपालिकाले सञ्चालन गरेको आईसोलेशनमा खटिने एकजना नर्सलाई कोरोना संक्रमण पुष्टि भएको छ । महानगरमा ४ बजेसम्म प्राप्त भएको तथ्यांकमा ८ जनामा कोरोना संक्रमण पुष्टि भएको छ । संक्रमित राखिएको आईसोलेशनमा स्वास्थ्य परामर्शका लागि खटिने नर्समा संक्रमण पोजेटिभ देखिएको हो ।
जसमा विराटनगर २ मा १ महिला १ पुरुष, विराटनगर ४ मा १ पुरुष, ६ मा ३ पुरुष, १६ मा १ पुरुष र ८ मा १ महिलामा संक्रमण पुष्टि भएको महानगर स्वास्थ्य निर्देशक राजेन्द्र कुईकेलले जानकारी दिनुभयो । कोशी अस्पताल विराटनगरको ल्याबमा गरिएको पीसीआर परीक्षणमा नर्ससहित ८ जनामा संक्रमण पुष्टि भएको हो ।
महानगरपालिकाले तीन स्थानमा संक्रमित राख्ने आइसोलेसन बनाएको छ । मारवाडी सेवा सदन, कालि मन्दिर र विराटनगर १९ स्थित स्वास्थ्य चौकीको भवनमा आइसोलेसन सञ्चालनमा छन् ।
यसैगरी नोबेल मेडिकल कलेज विराटनगरमा एकजना नर्स र एकजना कर्मचारीमा पनि कोरोना संक्रमण पुष्टि भएको छ । अस्पतालका प्रवन्धक नारायण दाहालका अनुसार शनिबार थप दुईजनासहित नोबेलमा संक्रमितको संख्या २२ जना पुगेको छ ।
