विराटनगर । प्रतिबन्धित भारतीय रुपैँया पाँच सय दरका नोटसहित विराटनरमा एकजना पक्राउ परेका छन् । विराटनगर महानगरपालिका–१६ हुलास मेटल चोकबाट एक लाख ३२ हजार ५०० रुपैयाँसहित धनुषाका ४३ वर्षीय सन्तोष महतोलाई सशस्त्र प्रहरीले पक्राउ गरेको हो ।
सशस्त्र प्रहरी बल बीओपी रानीको टोलीले शुक्रबार बिहान भारतबाट नेपाल आउँदै गरेको अवस्थामा उनलाई नियन्त्रणमा लिइएको सशस्त्र प्रहरी बल ३ नम्बर बाहिनीका एसपी तीर्थ पौडेलले जानकारी दिनुभयो ।
सुनसरीको इटहरी–६ आइतबारेमा बस्दै आएका महतो दरैया नाका हुँदै नेपाल छिरेको खुलेको छ । चेकजाँच गर्ने क्रममा महतोले बोकेको झोलामा प्रतिबन्धित भारतीय नोट फेला परेको पौडेलले बताए ।
बरामद भएको रकम नेपाली दुई लाख १२ हजार रुपैयाँ हुन्छ । पाँच सय दरमाथिका भारतीय नोट नेपालमा प्रतिबन्धित छ । महतोले उक्त नोटको स्रोत खुलाउन नसकेको सशस्त्रले जनाएको छ ।
सशस्त्रले बरामद भएको नोट अवैध हुण्डी कारोबारको भएको हुन सक्ने आशंका गरेको छ । उनलाई विदेशी विनियम ऐनअनुसार आवश्यक कारवाहीका लागि विराटनगर भन्सार कार्यालयमा बुझाउने तयारी गरिएको जानकारी एसपी पौडेलले दिए ।
