विराटनगर । विराटनगर कारागारबाट ३० जना र बालसुधार गृहबाट १ गरि ३१ जनाले कैदीको कैद सजाय मिनाहा भएको छ । विराटनगर कारागारका जेलर सुवास लामिछानेका अनुसार राष्ट्रिय प्रजातन्त्र दिवसको अवसरमा सरकारले उनीहरुको कैद मिनाहा गरेको हो ।
विराटनगर कारागारबाट कैद मिनाहा पाउनेहरुमा सबैभन्दा धेरै कर्तव्य ज्यान मुद्दाका १६ जना रहेका छन् । यसैगरी सवारी ज्यानमा ६ जना, ज्यान मार्ने उदोगमा ३ जना, कुटपिट अंगभङ्ग २ जना, डाका एक र चोरी एकजनारहेका छन् । यसैगरी गौबधमा एकजनाले कैद मिनाहा पाएका हुन् । बालसुधार गृहमा लापवाहीबाट हत्या, हातहतियार खरखजनाका एकजना कैदीको कैद मिनाहा भएको लामिछानेले जानकारी दिनुभयो ।
नेपाल सरकारले चार सय एक जना कैदीको कैद सजाय मिनाहा गरेको छ । राष्ट्रिय प्रजातन्त्र दिवसको अवसरमा मन्त्रिपरिषद्को सिफारिसमा राष्ट्रपति विद्यादेवी भण्डारीले कैदमा माफी मिनाहा गरिदिएकी हुन् । प्रशासन कार्यालय र कारागार शाखाको सिफारिसमा असल बानीव्यहोरा भएका, कारागारको मापदण्ड पूरा गरेका कैदीलाई सजाय छुट दिने व्यवस्था र मापदण्ड अनुरुप सरकारले यो निर्णय लिएको हो ।
प्रत्येक वर्ष प्रजातन्त्र दिवसका अनवसारमा विभिन्न कारागारमा रहेका कैदीलाई अदालतबाट भएको फैसला बमोजिम लागेको कैद, जरिवाना, सर्वस्वलगायतको सजायमा माफी दिने गरिएको छ । आज ९शुक्रबार० देखि लागू हुने गरेर कैदीको भुक्तान हुन बाँकी कैद कट्टा गरी माफी मिनाहा सरकारबाट भएको हो ।
सर्वोच्च अदालतको गत साउन १९ गतेको परमादेशसमेतको आधारमा फौजदारी कसूर (सजाय निर्धारण तथा कार्यान्वयन ऐन), २०७४ लागू हुनुपूर्व गरेको कसूरमा जन्मकैदको सजाय तोकिएकालाई कैद छुट दिइएको हो।
