विराटनगर । नेपाली काँग्रेस महाधिवेशन अन्तर्गत विराटनगर–६ को वडा अधिवेशन मनदान अधिकृतको लापर्वाहीका कारण स्थगीत भएको छ । उमेद्वारी दर्ता गराएका उमेद्वारको नाम ब्यालेटमा समावेश नगरिएको भन्दै उत्पन्न विवादपछि निर्वाचन बिहीबार लागि सारिएको हो ।
मतदान अधिकृत डिल्ली दाहालले भने क्रियाशिलले लगाएको आरोपको खण्डन गर्नु भएको छ । मनोनयनपत्र र रजिष्टरमा उल्लेख गरिएको नामका आधारमा ब्यालेट बनेको छ, मतदान अधिकृत दाहालले भन्नुभयो–मनोनयन नै नगरेका व्यक्तिहरुले आफू पनि उमेद्वार भएको दावी गरेर निर्वाचन रोक्नु परेको हो ।
विराटनगर–६ स्थित श्री शिक्षा सदन माध्यमिक विद्यालयमा बुधबार बिहान ८ः३० बजेदेखि मतदानको समय तोकिएको थियो । त्यसैका आधारमा सूचना प्रकाशित भएपछि काँग्रेसका क्रियाशिल सदस्यहरु मतदानस्थलमा आईपुगेका थिए । तर, मतदान अधिकृतसहितको टोलि भने दिउँसो ३ः३० मिनेटमा मात्रै मतदानस्थलमा आईपुगेको काँग्रेसका युवा प्रकाश मण्डल (भोला)ले जानकारी दिनुभयो । झण्डै ५० वटा मत खसिसकेपछि उमदेवारको नाम समावेश नगरेको पाइएपछि विवाद सुरु भएको थियो ।
विवादपछि आक्रोशित भिडले मतदान अधिकृतमाथि आक्रमणको प्रयास गरेका थिए । उनलाई कोठामा थुनेर प्रहरीले बाहिरी घेराबाट सुरक्षा दिएको थियो । यसैगरी मतदान अधिकृत भएको कक्षमा समेत प्रहरी खटाइएको थियो ।
मनोनयन गरिएकामध्ये १० जना भन्दा बढी उमेद्वारको नाम बिनाकै ब्यालेट बनाएको आरोप मतदान अधिकृतलाई छ । कसैको तीन ठाउँमा नाम छ, कसैको छैन, मण्डलले भने–मतदान अधिकृत भएपछि लापर्वाही गर्न मिल्दैन । मतदाताले मतदान अधिकृत समेत फेर्नु पर्ने माग गर्दै नाराबाजी गरेका थिए ।
