विराटनगर। विमल घर्ती मगरले ५५ औं मिनेटमा गरेको एक मात्र गोलले नेपालले पहिलो मैत्रीपूर्ण खेलमा मोरिससलाई १–० अन्तरले पराजित गरेको छ । दशरथ रंगशालामा शनिबार भएको खेलमा विमलले ५५ औं मिनेटमा अन्जन विष्टको पासमा गोल गरेका थिए । त्यहि गोल निर्णायक बन्दै नेपाल मोरिसस विरुद्धको खेलमा विजयी बनेको हो ।
राष्ट्रिय टिममा २६ महिनापछि फर्केका विमलले पुनरागमन गरेको पहिलो खेलमै गोल गर्न सफल भएका छन् । सन् २०१९ नोभेम्बरमा म्यानमार विरुद्ध पछिल्लो पटक राष्ट्रिय टिममा खेलेका विमल प्रतिवन्ध र चोटका कारण दुई वर्ष राष्ट्रिय टिमबाहिर थिए । मुख्य प्रशिक्षक अबदुल्लाह अलमुताइरीले विमललाई यसपटक टिममा राख्दै पहिलो रोजाईमा अवसर दिएका हुन् ।
नेपालका लागि विमलको यो नवौँ गोल हो । यसअघि उनले सन् २०१८ मा ढाकामा बंगलादेश विरुद्ध साफ च्याम्पियनसिपमा पछिल्लो पटक गोल गरेका थिए । यस्तै यसै खेलबाट डिफेण्डर देवेन्द्र तामाङ र जगजित श्रेष्ठले पनि राष्ट्रिय टिममा कमब्याक गरे । देवेन्द्रले पहिलो रोजाईमा खेल्दा जगजित दोस्रो हाफमा मैदान प्रवेश गरेका थिए ।
