विराटनगर । रुद्र गौरी/श्री अम्बिका ओली प्रतिष्ठानले मानव हित तथा सकारात्मक सामाजिक विकासमा अनुकरणीय योगदान पुर्याएका व्यक्ति तथा संस्थाहरूलाई नगद सहित सम्मान गरेको छ ।
आईतबार एक कार्यक्रमको आयोजना गरि प्रतिष्ठानले उनीहरुलाई सम्मान गरेको हो । पूर्व प्रधानमन्त्री तथा वरिष्ठ साहित्यकार लोकेन्द्र बहादुर चन्दले एक समारोह बिच उनीहरुलाई पुरस्कृत गरेका हुन् । प्रतिष्ठानद्वारा स्थापना गरिएको अक्षय कोषबाट हरेक दुई वर्षमा प्रदान गरिने ५ लाख राशिको श्रीप्रसाद ओली स्मृति प्रज्ञान पुरस्कार पहिलो पटक नेपालको अर्थ व्यवस्थाको संस्थागत सुधारमा योगदान पुर्याएवापत नेपाल राष्ट्र बैंकका प्रथम गभर्नर काठमाडौँका हिमालय शम्सेर जबरालाई प्रदान गरिएको छ ।
विगत ९ वर्षदेखि प्रदान गरिँदै आएको १ लाख १ हजार १ सय ११ राशिको रूद्रप्रसाद ओली राष्ट्रिय कृषि पुरस्कार खोटाङ जिल्लामा जीवन उपयोगी व्यावहारिक ज्ञानसहित व्यावसायिक कृषि लगायतका बिषयमा शिक्षा प्रदान गरी श्रमप्रति सम्मान गर्ने प्रवृत्ति विकासका गर्न अनवरत रुपमा कृषिविज्ञ मदन राईको नेतृत्वमा स्थापित ललितपुरस्थित ‘सुभद्रा–मदन फाउन्डेसन’ र कृषि पेसामा यान्त्रिकरणका माध्यमबाट उत्पादकत्व अभिवृद्धि, विद्यमान अधिक श्रम तथा समय खर्चिने परिपाटीमा सुधार गर्न सानादेखि ठुला कृषि औजार समेत उत्पादन गरी देशको कृषि क्षेत्रमा तथा अर्थतन्त्रमा टेवा पुर्याए बापत काठमाडौस्थित ‘चन्द्रा गिरी मेशिनरी उद्योग’का सञ्चालक गोविन्द भक्त श्रेष्ठलाई संयुक्त रुपमा प्रदान गरिएको छ ।
त्यसैगरी १ लाख १ हजार १ सय ११ राशिको गौरादेवी स्मृति राष्ट्रिय आदर्श आमा पुरस्कार अपाङ्गता भएका व्यक्ति, ज्येष्ठ नागरिकलाई सेवा, महिलाहरूको आर्थिक सशक्तीकरण, पारिवारिक स्वास्थ्य सेवा, प्राकृतिक तथा सामाजिक प्रकोपका पीडितहरूको उद्धार, सामाजिक कु संस्कारविरुद्धको अग्रसरता साथै धार्मिक अनुष्ठानहरूमा पुर्याउनु भएको योगदान बापत काठमाण्डौं निवासी युवती खड्का केसीलाई र सोही राशिको अम्बिका ओली स्मृति राष्ट्रिय साहित्य तथा पत्रकारिता पुरस्कार विगत साढे ४ दशकदेखि निरन्तर नेपाली साहित्यको विकासमा क्रियाशील हुनुभई नेपाली साहित्यको वृद्धिमा उल्लेख्य भूमिका निर्वाह गर्दै आएका कवि, कथाकार, निबन्धकार, समालोचक र नाट्यकर्मी मोरङ विराटनगरका विवश पोखरेललाई पुरस्कृत गरिएको थियो ।
रूद्र–गौरी, श्री–अम्बिका ओली प्रतिष्ठानद्वारा काठमाडौस्थित नेपाल पर्यटन बोर्डको सभाकक्षमा आयोजित नवौँ पुरस्कार वितरण समारोहलाई प्रमुख अतिथि पूर्व प्रधानमन्त्री तथा वरिष्ठ साहित्यकार लोकेन्द्र बहादुर चन्द, विशिष्ट अतिथिद्वाय पूर्व मन्त्री भद्र घले, वरिष्ठ पत्रकार भैरव रिसाल, काठमाडौ विश्वविद्यालयका पूर्व उपकुलपति प्रा.डा. सुरेशराज शर्मा, नेपाल प्रज्ञ प्रतिष्ठानका उपकुलपति डा. जगमान गुरुङ र पाँचै जना पुरस्कृत व्यक्तिले सम्बोधन गरेका थिए । पुरस्कार वितरण समारोह प्रतिष्ठानका अध्यक्ष गंगाप्रसाद ओलीको सभापतित्वमा सम्पन्न भएको थियो ।
