विराटनगर । मतपेटिकामा खसेको भन्दा बढी मतपत्र भेटिएपछी माेरङकाे रंगेली नगरपालिकामा जारी मतगणना स्थगित भएको छ ।
वडा नं. ७ को मतगणनाको क्रममा १०७ मत बढी भेटिएपछि पार्टीका कार्यकर्ताहरुको विरोधले रङ्गेलीको सबै वडाको मतगणना रोकिएको हो । रङ्गेली नगरपालिका वडा नं. ७ मा कुल ३२४२ मत खसेको थियो । तर, गणनाको क्रममा ३३४९ वटा मतपत्र भेटिएपछि विवाद निस्किएको हो । प्राप्त जानकारी अनुसार वडा नं. ७ मा २१३३ मत गणना भईसकेको थियो । १२१६ मत गणना गर्न बाँकी हुँदा विवाद सुरु भएर अहिले सबै वडाको गणना कार्य रोकिएको छ ।
रङ्गेलीका निर्वाचन अधिकृत रामहरी काफ्लेले प्राविधिक त्रुटिका कारण कम्प्युटरमा बढी मत प्रविष्टि भएको बताए । उनले उक्त वडाको मत पुन: गणना गर्न सकिने जिकिर गरे । उनले भने, 'हामीले वडा नं. ७ बाट १० वटा मतपेटिका बुझिलिएका थियौं । मतगणना गरी कम्प्युटरमा प्रविष्टि गर्ने क्रममा प्राविधिक त्रुटि भएको हो । १ सय मत बढी प्रविष्टि भएछ ।'
यता, मतगणनामा धाँधली भएको भन्दै आक्रोशित पार्टीका कार्यकर्ताहरुले मतगणना स्थल बाहिर टायर बालेर प्रदर्शन समेत गरेका छन् ।
