फूलबारी (कैलाली) । सामाजिक सुरक्षा भत्ता बुझ्न भएका एक वृद्धको मृत्यु भएको छ ।
कैलाली धनगढी १८ फूलवारीका ७४ वर्षीय गुलिराम चौधरीको मृत्यु भएको हो । भत्ता बुझ्न धनगढी उपमहानगरपालिका १८ को वडा कार्यालय पुगेका चौधरी एकाएक ढलेपछि उपचारका लागि धनगढी लैजाँदै गर्दा बाटोमै मृत्यु भएको हो ।
उहाँ सामाजिक सुरक्षा बुझ्न लाममा बसेका बेला एका एक ढल्नुभएको थियो । उहाँ दम र मधुमेह रोगको पीडित रहेको धनगढी १८ का वडा अध्यक्ष भुवन रिजालले जानकारी दिनुभयो । उहाँकोे मृत्यु भएको २४ घण्टा नबित्दै बुधबार ६० वर्षीय छोरा लिलाराम चौधरीको समेत मृत्यु भएको हो ।
लिलाराम बुवाको अन्तिम दाहसंस्कार गरेर फर्किने बितिक्कै मृत्यु भएको वडा अध्यक्ष रिजालले जानकारी दिनुभयो । लिलाराम पनि केही दिनदेखि बिरामी अवस्थामै रहेको बताइएको छ । गोरखापत्रबाट
