रत्ननगर । सङ्घीय सरकारले चितवन जिल्लालाई आगामी आर्थिक वर्ष २०७९/८० का लागि रु.चार अर्ब ७२ करोड २१ लाख बजेट विनियोजन गरेको छ । जिल्लामा महानगरपालिका एक, नगरपालिका पाँच र गाउँपालिका एक छ ।
जिल्लामा सबैभन्दा बढी बजेट भरतपुर महानगरपालिकालाई रु.एक अर्ब ८० करोड २४ लाख अनुदान बजेट विनियोजन गरिएको छ । भरतपुरले आगामी आवका लागि समपूरक बजेट रु.दुई करोड ५० लाख र विशेष अनुदान रु.१४ करोड आठ लाखसमेत पाएको छ । त्यस्तै रु.एक अर्ब २२ करोड ४५ लाख सशर्त अनुदान पाएको भरतपुरले वित्तीय समानीकरण अनुदानमा रु.५१ करोड ६९ लाख पाउने भएको छ ।
गत वैशाख ३० गते सम्पन्न स्थानीय तह निर्वाचनमा महानगरपालिकाको प्रमुखमा नेकपा (माओवादी केन्द्र)का उम्मेदवार रेनु दाहाल निर्वाचित हुनुभएको छ । नगरप्रमुख दाहालकै पहलमा भरतपुरमा ठूला–ठूला आयोजना आउन सफल भएका छन् । सङ्घीय सरकारले यसै वर्षदेखि सुरु गर्ने गरी भरतपुरमा शिक्षक अस्पतालका लागि समेत बजेट छुट्याइसकेको छ ।
यसैगरी जिल्लामा दोस्रो बढी बजेट प्राप्त गर्ने रत्ननगर नगरपालिका छ । यस नगरपालिकाले रु.५९ करोड ७२ लाख बजेट सङ्घीय सरकारबाट पाएको छ । यसमा समानीकरण अनुदान रु.२० करोड ९६ लाख, सशर्त अनुदान रु.३३ करोड ७६ लाख र विशेष अनुदान रु.पाँच करोड छ ।
त्यस्तै राप्ती नगरपालिकाले सङ्घीय सरकारबाट रु.५५ करोड ५९ लाख बजेट पाएको छ । राप्तीले पाएको बजेटमध्ये समानीकरण अनुदान रु.१८ करोड ५३ लाख, सशर्त अनुदान रु.२४ करोड २६ लाख र विशेष अनुदानतर्फ रु.दुई करोड रहेको छ । माडी नगरपालिकाले सङ्घीय सरकारबाट अन्तरसरकारी वित्तीय हस्तान्तरणमार्फत रु.४९ करोड ६० लाख प्राप्त गरेको छ । जसमध्ये समानीकरण अनुदान रु.१३ करोड ९२ लाख, सशर्त अनुदान रु ३१ करोड ९८ लाख र विशेष अनुदान रु.दुई करोड ५० लाख रहेको छ ।
खैरहनी नगरपालिकाले सङ्घीय सरकारबाट आव २०७९/८० मा रु.४८ करोड आठ लाख बजेट प्राप्त गरेको छ । जसमध्ये समानीकरण अनुदानमा रु.१८ करोड १८ लाख, सशर्त अनुदानमा रु.२५ करोड १२ लाख र विशेष अनुदानमा रु.तीन करोड ५८ लाख रहेको छ । त्यस्तै कालिका नगरपालिकाले रु.४० करोड ९८ लाख बजेट पाएको छ । जसमध्ये समानीकरण अनुदान रु.१५ करोड ५६ लाख, सशर्त अनुदान रु.२३ करोड ४२ लाख र विशेष अनुदान रु.एक करोड प्राप्त गरेको छ ।
जिल्लाको इच्छाकामना गाउँपालिकाले सङ्घीय सरकारबाट जिल्लाका स्थानीय तहमा सबैभन्दा कम बजेट प्राप्त गरेको छ । गाउँपालिकाले आव २०७९/८० मा अन्तरसरकारी वित्तीय हस्तान्तरणमार्फत सङ्घीय सरकारबाट रु.३८ करोड बजेट प्राप्त गरेको छ । गाउँपालिकाले समानीकरण अनुदानअन्तर्गत रु.११ करोड १९ लाख, सशर्त अनुदानमा रु.२४ करोड ३१ लाख र विशेष अनुदानमा रु.एक करोड ७० लाख प्राप्त गरेको छ ।
